İraq səfirliyində baş verən yanğın söndürüldü

Bu ölkənin Azərbaycandakı səfirliyində baş verən yanğının səbəbləri açıqlanıb

Bu gün saat 17.00-da İraqın Azərbaycandakı səfirliyində baş verən yanğına elektrik xətlərində qısa qapanma səbəb olub.

APA-nın hadisə yerində olan əməkdaşının verdiyi məlumata görə, yanğının söndürülməsi üçün hadisə yerinə altı yangınsöndürən maşın cəlb olunub. Səbayel rayon Polis İdarəsinin rəis müavini Kamal Vəlişov APA-ya açıqlamasında hadisə zərərçəkən olmadığını deyib. Səfirliyin əməkdaşları binadan evakuasiya olunub, yanğın 17.30 radələrində söndürülüb.

Hazırda Fövqəladə Hallar Nazirliyinin qaz istismar idarəsinin və digər dövlət strukturlarının nümayəndələri hadisə yerindədir. Yanğınsöndürənlər alovun Rus Dram Teatrının binasına və qonşuluqdakı digər binalara keçməsinin qarşısı alıblar. Səfirliyin əməkdaşlarının APA-ya verdiyi məlumata görə, yanğın zamanı səfir Ərşad Ömər İsmayıl binada olmayıb. Onlar yanğın nəticəsində binaya müəyyən qədər ziyan dəydiyini deyiblər.