Türkiyədə vətəndaşlarımızı daşıyan avtobus aşıb: 3 ölü

Türkiyədə içərisində Azərbaycan vətəndaşları olan avtobus qəzaya uğrayıb. APA-nın “CNN-Turk”ə istinadən verdiyi məlumata görə, 90 DS 393 dövlət nömrə nişanlı sərnişin avtobusu Sivasda Şarkışla-Pınarbaşı yolunun Tökmədaş kəndi ərazisində aşıb.

İlkin məlumata görə, qəza nəticəsində 2 nəfər ölüb, 20 nəfər yaralanıb. Ümumilikdə avtobusda 30 sərnişin, sürücü və onun iki köməkçisi olub. Əraziyə çoxlu sayda təcili tibbi yardım maşını, polis və jandarma qüvvələri gəlib.

Aşan avtobusun altında qalanların olduğu güman edilir. Xilasetmə işlərinə yerli sakinlər də qoşulub.

Ölən və yaralananların adı hələlik məlum deyil.

Azərbaycanın Türkiyədəki səfirliyindən APA-ya hadisə barədə məlumat aldıqlarını, araşdırma aparıldığını bildiriblər.

“Star” qəzeti isə qəza nəticəsində 3 nəfərin öldüyü, 30 nəfərin yaralandığı barədə xəbər verib.