Göyçayda iki bacı qazdan boğulub

Bu gün Azərbaycanın Göyçay rayonunda təbii qaz sızmasından bir ailənin iki üzvü ölüb, digəri isə komaya düşüb.

APA-nın yerli bürosunun xəbərinə görə, hadisə bu gün saat 5.15 radələrində baş verib.

Göyçay şəhəri Məmməd Əmin Rəsulzadə küçəsi 2 ünvanında yaşayan Nazir Rzayevin evində təbii qaz sızması baş verib. Nəticədə onun qızı 1995-ci il təvəllüdlü Rzayeva Sevinc, 1997-ci il təvəllüdlü Rzayeva Nazlı dünyasını dəyişib. Ailənin 1999-cu il təvəllüdlü digər övladı Rzayeva Leyla isə koma vəziyyətində rayon Uşaq Xəstəxanasına yerləşdirilib.

Məlumata görə, ailənin üç qız, bir oğlan övladı var. Təbii qaz sızması qızlar yatan otaqda baş verib.

Hadisəyə gecə saatlarında təbii qazın verilişinin dayandırılması və yenidən bərpa olunması səbəb olub.

Faktla bağlı Göyçay rayon Prokurorluğunda araşdırma aparılır.