Mehdiabadda 12 yaşlı məktəbli sinif yoldaşını döyüb öldürdü

Azərbaycanın Abşeron rayonunda 12 yaşlı məktəbli sinif yoldaşını xüsusi amansızlıqla qətlə yetirib.

Abşeron rayon Prokurorluğundan APA-ya verilən məlumata görə, hadisə rayonun Mehdiabad qəsəbəsindəki 3 saylı orta məktəbdə baş verib. Məlumata görə, həmin məktəbdə təhsil alan 5-ci sinif şagirdi, 1997-ci il təvəllüdlü Yusif İslam oğlu Mahmudov sinif yoldaşı, 1997-ci il təvəllüdlü Toğrul Qulami oğlu Xuduyevi döyüb. Müxtəlif bədən xəsarətləri ilə Mərkəzi Klinik Xəstəxanasına çatdırılan T. Xuduyevin qarın nahiyəsindən çoxsaylı təpik zərbələri aldığı və xüsusi amansızlıqla döyüldüyü məlum olub.

T. Xudiyevin aldığı xəsarətlər ağır olduğundan onun həyatını xilas etmək mümkün olmayıb.

Abşeron rayon Prokurorluğundan, həmçinin bildirilib ki, hadisəni törədən azyaşlı olduğu üçün həbs edilməyib. Lakin onun barəsində Cinayət Məcəlləsinin 126.3-cü (qəsdən sağlamlığa ağır zərər vurma - bu əməl xüsusi amansızlıqla, zərərçəkmiş şəxsə iztirablar verməklə və ya sifarişlə, habelə təqsirkar üçün aşkar surətdə köməksiz vəziyyətdə olan şəxsə qarşı törədildikdə) maddəsi ilə cinayət işi başlanıb, araşdırma aparılır.