Ramiz Rzayev: “Avropa Məhkəməsi hansısa ölkəni cəzalandıra bilməz”

“İnsan Hüquqları üzrə Avropa Məhkəməsi 2002-2008-ci illər ərazində Azərbaycandan daxil olan şikayətlərdən 14-ü təmin edib”.

APA-nın xəbərinə görə, bu barədə Ali Məhkəmənin sədri Ramiz Rzayev bu gün keçirdiyi mətbuat konfransında deyib. Məhkəmə sədrinin sözlərinə görə, digər ölkələrlə müqayisədə, bu rəqəm elə də böyük deyil: “Bəzi mətbuat vasitələrində Avropa Məhkəməsinin iş prosesi düzgün göstərilmir. Məlumat üçün deyim ki, Avropa Məhkəməsi işin mahiyyətinə yox, prosedurasına baxır və bu barədə qərar verir. Avropa Məhkəməsi bəzi mətbuat orqanlarında yazıldığı kimi, hansısa ölkəni cəzalandıra bilməz”.

R. Rzayev İnsan Hüquqları üzrə Avropa Məhkəməsində mənzil mübahisələri haqda Azərbaycana dair çıxarılan qərarlara da münasibətini bildirib: “Mülkiyyət hüququ qanunla çox ciddi şəkildə qorunur. Son vaxtlar bəzi mənzil sahiblərinin əvvəllər evlərində məskunlaşan məcburi köçkünlərlə bağlı məhkəmələrə müraciət etməsi təbii haldır. Həmin mənzillərdə yaşayan bəzi məcburi köçkünlərin problemləri həll edilib. Qalanlarının probleminin həll edilməsi isə bu barədə hazırlanan Dövlət Proqramına salınıb. Göstəriş verilib ki, bu insanların məskunlaşması üçün Bakıda və Sumqayıtda binalar tikilsin. Prosesin icrası isə Qaçqın və Məcburi Köçkünlərin İşləri üzrə Dövlət Komitəsinə tapşırılıb”.