Valyutadəyişmə məntəqəsi işçisinin 40 min manatı oğurlandı

Naməlum şəxslər Mürşid Hüseynovu bıçaqlayaraq, pulunu və 14 manatlı qızıl-zinət əşyasını alıblar

Azərbaycanın Sumqayıt şəhərində valyuta dəyişmə məntəqəsinin işçisinə basqın edərək külli miqdarda pulunu və qızıl-zinət əşyalarını aparıblar.

Sumqayıt şəhər hüquq-mühafizə orqanlarından APA-ya verilən məlumata görə, hadisə ötən gecə şəhərin 41-ci məhəlləsində, 1 b ünvanında yerləşən yaşayış binasının qarşısında baş verib. Həmin binanın sakini, “Karvan” ticarət mərkəzində fəaliyyət göstərən valyutadəyişmə məntəqəsində çalışan Mürşid Cümşüd oğlu Hüseynov işdən evə qayıdarkən yaşadığı binanın 1-ci blokunun qarşısında naməlum şəxslərin basqınına məruz qalıb.

Naməlum şəxslər ona bıçaqla bir neçə dəfə zərbə endirərək əlində olan 40 min manat pulunu və 14 min manat dəyərində qızıl-zinət əşyalarını alaraq, hadisə yerindən qaçıblar. Zərərçəkən döş qəfəsindən aldığı ağır bıçaq xəsarətləri ilə Sumqayıt şəhər Xəstəxanasına yerləşdirilib. Həkimlər onun vəziyyətini stabil qiymətləndirir.
Hadisə baş verəndən dərhal sonra həmin əraziyə Sumqayıt şəhər Polis İdarəsinin və şəhər Prokurorluğunun əməkdaşları gəlib. Hazırda şəhər hüquq-mühafizə orqanları hadisəni törədənlərin tapılması istiqamətində əməliyyat-axtarış tədbirlərini davam etdirir.