Sumqayıtda 11 yaşlı qız polisi ayağa qaldırıb

İki günlük nəticəsiz axtarışdan sonra... qız özü evlərinə dönüb

Azərbaycanın Sumqayıt şəhərində 11 yaşlı qız polisi ayağa qaldırıb. Sumqayıt şəhər Polis İdarəsindən Lent.az-a verilən məlumata görə, şəhərin Z.Tağıyev qəsəbəsinin sakini Solmaz Babayeva fevralın 14-də polisə müraciət edərək, qızı, 1998-ci il təvəllüdlü Yeganə Babayevanın itkin düşməsi barədə məlumat verib. Anası müraciətində qızının səhər saat 8-də dərsə getmək adı ilə evdən çıxdığını və bir daha geri dönmədiyini bildirib.

11 yaşlı qızın yoxa çıxması ilə əlaqədar dərhal əməliyyat qrupu yaradılıb və onun tapılması istiqamətində əməliyyat-axtarış tədbirlərinə başlanılıb. Aparılan axtarış tədbirləri heç bir nəticə verməyib.

İki gün sonra isə Y.Babayeva özü evə qayıdıb. Polis itkin düşmüş qızın azyaşlı olmasını nəzərə alaraq, onun iki gün ərzində harada olması barədə heç bir məlumat verməyib.

Hafiz Heydərov