Xaçmazda məscid binası uçdu

Hadisəyə səbəb son günlər yağan intensiv yağışlar olub

Xaçmaz rayonunun Pərdiqıran kəndində köhnə məscid binası uçub. ANS PRESS-in bölgə müxbirinin məlumatına görə, hadisəyə səbəb son günlər yağan intensiv yağışlar olub. Belə ki, əvvəl binanın bir hissəsi uçub, fevralın 14-nə keçən gecə isə tikili tamamilə çöküb. Kənd sakinləri bildiriblər ki, məscid 19-cu əsrin ortalarında tikilib. Sovet dövründə tikili məktəb kimi istifadə olunub. Bina qəza vəziyyətində olduğundan son iki ildir istifadəsiz qalıb. Buna baxmayaraq sakinlər məsciddə dini abidə kimi daim təmizləmə işləri aparıblar.

Hadisə nəticəsində xəsarət alan olmayıb.

Hadisə barədə Xaçmaz rayon Fövqaladə Hallar Komissiyasına məlumat verilib. Rayon Fövqaladə Hallar Komissiyasının sədri Asif Mərdanov məscidin yenidən tikilməli olduğunu və bunun kənd bələdiyyəsi tərəfindən həyata keçiriləcəyini bildirib.