Bakıda iş adamına 375 min dollarlıq qızıl “atıblar” - EKSKLÜZİV

Bakı sakininin külli miqdarda qızıl-zinət əşyaları mənimsənilib. Lent.az-ın əldə etdiyi məlumata görə, paytaxt sakini 1982-ci il təvəllüdlü Cəfərov Şükür Yusif oğlu Yasamal rayon Polis İdarəsi, 28-ci Polis Bölməsinə müraciət edib. Ş.Cəfərov bildirib ki, bu ilin 2 yanvar tarixindən bəri Rüstəm adlı şəxs ondan 375 min dollar dəyərində qızıl-zinət əşyaları alıb. Lakin həmin şəxs 10 ay keçməsinə baxmayaraq, nə qızılı, nə də qızılın dəyəri olan pulu verməyib.

Lent.az-ın əldə etdiyi digər məlumata görə, Ş.Cəfərov iş adamıdır və Mərkəzi Univermaqda qızıl alveri ilə məşğul olur. Rüstəm adlı şəxs isə onun daimi müştərisi olub. Həmin şəxs Ş.Cəfərovdan dəfələrlə böyük məbləğlərdə qızıl alış-verişi edib. Beləliklə də o, Ş.Cəfərovun etimadını qazanıb və ondan 375 min dollar dəyərində qızılı alaraq banka girov qoyub, böyük məbləğdə pul götürüb. Bundan sonra isə Rüstəm Şükürdən aldığı qızılları və ya onun dəyəri olan pulu qaytarmaqdan imtina edib.

Hazırda fakt üzrə araşdırmalar davam etdirilir.

Nizam RZA