Kılıçdaroğlu Ərdoğanı topa tutdu: “Dəstənin rəisi sənsən!”

Türkiyənin ana müxalifət partiyası olan CHP-nin sədri Kamal Kılıçdaroğlu 3 nazir oğlunun həbs edildiyi “Böyük rüşvət” əməliyyatının ardından ilk dəfə geniş açıqlama ilə çıxış edib.

Lent.az-ın Türkiyə mediasına istinadən verdiyi məlumata görə, CHP sədri açıqlamasında Ərdoğanı sərt tənqid edib.

O, övladları həbs edilən nazirlərin hələ də vəzifədə qalmalarını və istefa verməməklərini sərt dillə tənqid edərək deyib ki, baş nazir Ərdoğan bu şəxsləri qoruyur.

K.Kılıçdaroğlunun sözlərinə görə, Ərdoğan “dövlət içində dövlət”in olduğunu deyir: “Bəs, oğrunun heçmi günahı yoxdur? Ölkədə hər şey bir diktatorun iki dodağının arasındadır. Sən o nazirləri niyə hələ də orda saxlayırsan? Saxlayırsansa, deməli, sən də o korrupsiyanın bir parçasısan”.

Ərdoğanın keçirilən əməliyyatdan xəbərsiz olmasına da toxunan CHP sədri deyib ki, baş nazir əməliyyatdan xəbər tutub, onun qarşısını almaq üçün bundan şikayətlənir: “Sənə xəbər verilməsi cinayətdir. Sənə xəbər verməyəni dəstə rəisi elan edirsən. Dəstə rəisi də, dəstənin özü də sənsən”.