İki Avropa ölkəsi öz qoşunlarını Ukraynaya göndərə bilər – şərtlər AŞIQLANDI

Fransa və Böyük Britaniya öz qoşunlarını Ukraynada yerləşdirmək imkanını nəzərdən keçirir. Bu məsələ Ukrayna və Rusiya arasında mümkün sülh danışıqları kontekstində, xüsusən də atəşkəs razılaşmalarına əməl olunmasına nəzarət etmək üçün gündəmə gətirilir.

Lent.az bildirir ki, bu barədə “Azadlıq” radiosu NATO-dakı yüksək rütbəli mənbəyə istinadən xəbər verir.

Onun sözlərinə görə, müzakirələr Paris və London səviyyəsində gedir, lakin NATO-nun rəsmi mövqeyinə təsir etmir.

Bu ölkələr ABŞ və yeni prezident Donald Trampın rolunu nəzərə alaraq, lazım gələrsə, Ukraynaya dəstək verməklə bağlı mümkün ssenarilər üçün müxtəlif variantlar hazırlayır.

Bu cür təkliflərin hazırlanması həm də Ukrayna və Rusiya arasında sülh danışıqlarında avropalı müttəfiqlərin iştirakını təmin etmək üçün vacibdir.

Fransa prezidenti Emmanuel Makron vurğulayır ki, Fransa Rusiya ilə döyüşmək niyyətində deyil və eskalasiyanı istəmir, lakin müdafiəsi üçün Ukraynaya hər cür köməklik göstərməyə hazırdır. Makron onu da qeyd edir ki, ölkəsi təhlükəsizliyi təmin etmək üçün lazım gələrsə, xüsusən də Rusiya qoşunları cəbhəni yarıb keçərsə, öz qoşunlarını Ukraynaya göndərmək imkanını istisna etmir. Eyni zamanda, Fransa Böyük Britaniya ilə birlikdə Ukraynada hərbi koalisiyaya rəhbərlik etmək imkanını aktiv şəkildə müzakirə edir.

Litvanın NATO-dakı səfiri Deyvidas Matulionis qeyd edib ki, Litva da öz növbəsində Fransa qoşunlarının Ukraynada yerləşdirilməsi ideyasını dəstəkləyir. O əlavə edib ki, bu cür qərarlar NATO-nun iştirakı olmadan ayrı-ayrı dövlətlər səviyyəsində qəbul edilə bilər.

Lakin konstitusiya bunu qadağan etdiyi üçün İtaliya öz qoşunlarını göndərməyi istisna edir, bunu ölkənin xarici işlər naziri Antonio Tayani də təsdiqləyib. Həmçinin Estoniyanın müdafiə naziri Hanno Pevkur belə hərəkətlərin yüksək risklərini nəzərə alaraq, Qərb qoşunlarının Ukraynaya göndərilməsinin məqsədəuyğunluğuna şübhə etdiyini bildirib.