Hindistanda pələng üç qadını parça-parça etdi

Hindistanda pələng hücumu nəticəsində üç qadın həyatını itirib. Hadisə Maharaştra ştatının Mendhamal kəndi yaxınlığındakı meşəlik ərazidə baş verib.

Lent.az xəbər verir ki, bu barədə "Times of India" nəşri məlumat yayıb.

Məlumata görə, dörd qadın meşədə vəhşi heyvanın hücumuna məruz qalıb. Pələng üç qadını öldürüb, dördüncü qadın isə ağır yaralanıb. Daha sonra ölən qadınların bədənlərinin hissələri kolların arasında tapılıb.

Zoologiya üzrə mütəxəssislər qeyd edirlər ki, bu hadisə regionda bir pələngin tək hücumla üç nəfəri öldürdüyünə dair ilk sənədləşdirilmiş haldır.

Hadisədən dərhal sonra Meşə Təsərrüfatı İdarəsinin əməkdaşları əraziyə cəlb olunublar. Yaralı qadın təcili olaraq xəstəxanaya yerləşdirilib.

Mütəxəssislər hesab edirlər ki, yırtıcıların təbii yaşayış mühitinin daralması səbəbindən hücumların sayı artmaqdadır. Təkcə Maharaştra ştatında son üç il ərzində vəhşi heyvanların - əsasən pələnglərin - hücumları nəticəsində 225 nəfər həyatını itirib.