Moskvanın “Domodedovo” hava limanı partladıldı – YENİLƏNİB

Moskvanın “Domodedovo” hava limanında terror aktı həyata keçirilib. Lent.az-ın “İTAR-TASS” agentliyinə istinadən verdiyi məlumata görə, nəticədə onlarla adam ölüb və yaralanıb.

“İnterfaks” agentliyinin məlumatına görə, partlayış nəticəsində 10 nəfər ölüb, 20 nəfər isə yaralanıb. İlkin məlumata görə, partlayışı terrorçu-kamikadze törədib. Şahidlər bildirirlər ki, partlayış baqajların təhvil verilmə zonasında həyata keçirilib. Hazırda həmin ərazidə güclü tüstülənmə var.

Güc strukturlarındakı adının çəkilməsinin istəməyən mənbə ölənlərin sayının 20 nəfərə çatdığını bildirib. Bloqlarda 70-ə qədər adamın öldüyü iddia edilsə də, bi məlumat hələlik təsdiqlənməyib. Hadisə yerinə 20-dən çox “təcili yardım” maşını göndərilib.

Partlayış beynəlxalq uçuşlar zalında törədilib. Hazırda milis metro stansiyalarını və əhalinin sıx toplaşdığı yerləri yoxlayır.