«BBC» Suriyanı suçlayır

Britaniyanın teleradio yayım şirkəti verilişlərin yayımlanmasında siqnalın kəsilməsi ilə bağlı yeni bəyanat açıqlayıb.
Lent.az-ın «lenta.ru»-ya istinadən məlumatına görə, şirkət bu problemin yaradılmasında Suriya rejimini suçlayıb.
Xatırladaq ki, ötən gün «BBC» Yaxın Şərqin bəzi bölgələrində yayım siqnalının boğulması üzündən fasilələrlə yayımlandığını bildirmişdi.

Şirkətin rəsmi açıqlamasına əsasən, belə «məqsədli hücumlara» «BBC Arabic» ərəbcə, «BBC World Service» ərəb və ingilis dilində redaksiyalarının verilişləri məruz qalır. «BBC»-nin məlumatına əsasən, «CNN» və «Amerikanın səsi» üçün də bu sayaq problemlər yaradılır.

Şirkət hesab edir ki, verilişlərin yayımının belə müdaxilə ilə kəsilməsi «televizyia yayımları ilə bağlı beynəlxalq qaydaların kobudcasına pozulmasıdır».

Mənbənin bildirdiyinə əsasən, Suriya hakimiyyəti qərb və ərəb dövlətlərinin informasiya vasitələrini «qərəzli və yalan xəbərlər» yaymaqda «ölkədə vətəndaş savaşını qızışdırmaqda» günahlandırıb.

Qərb KİV-i isə Bəşar Əsəd rejiminə yardım etdiyi üçün İran hakimiyyətini suçlayır.

Oktyabrın əvvəlində bu informasiya vasitəsinin yayımlandığı «Eutelsat» peyk təchizatçısı siqnalı boğduğu üçün İranı ittiham etmişdi.

Bu ilin fevralında isə «BBC» bildirmişdi ki, Tehran hakimiyyəti qurumun fars dilli verilişlərinin yayımını bir neçə dəfə kəsib, İrandakı əməkdaşları isə hədələnib.