Şəhid əsgərin medalı körpə qızının yaxasından asıldı - FOTOSESSİYA

Azərbaycan Respublikasının müdafiə naziri general-polkovnik Zakir Həsənovun 3 avqust 2014-cü il tarixli əmrinə əsasən, Xocavənd rayon sakini Quliyev Sənan Qeyrət oğlunun təltif edildiyi (ölümündən sonra) "Hərbi xidmətdə fərqlənməyə görə" 3-cü dərəcəli medal ailə üzvlərinə təqdim olunub.

Lent.az-ın məlumatına görə, medalı şəhidin körpə qız övladının yaxasından asan Müdafiə Nazirliyinin Mənəvi-Psixoloji Hazırlıq və İctimaiyyətlə Əlaqələr İdarəsi rəisinin müavini, polkovnik Abdulla Qurbani şəhidin ailəsinə Müdafiə Nazirliyi adından başsağlığı verərək dərin ehtiramını bildirib.

Mərasimdə Xocavənd rayon İcra Hakimiyyətinin başçısı, hərbiçilər və rayon ictimaiyyətinin nümayəndələri iştirak ediblər.

Qeyd edək ki, Quliyev Sənan Qeyrət oğlu 1991- ci il tarixdə Xocavənd rayonunun Qaradağlı kəndində dünyaya gəlib. O, öz borcunu ləyaqətlə yerinə yetirərək Vətənimizin toxunulmazlığı uğrunda öz canından keçərək avqust ayının 1-dən 2- nə keçən gecə Ermənistan silahlı birləşmələrinin hücumunun qarşısını alan zaman şəhid olub.

Allah cəmi Şəhidlərimizə rəhmət eləsin!