Elmar Məmmədyarov: ”Münaqişə regional əməkdaşlığa mane olur ”

Həlli uzanmış münaqişələri tənzimləmədən və regionda təhlükəsizlik və sabitliyi təmin etmədən İƏT hərtərəfli regional əməkdaşlıqdan tam şəkildə fayda götürə bilməyəcək”

Azərbaycanın xarici işlər naziri Elmar Məmmədyarov İqtisadi Əməkdaşlıq Təşkilatının Nazirlər Şurasının Tehranda keçirilən 21-ci iclasında çıxış edib.

Xarici İşlər Nazirliyinin mətbuat xidmətindən APA-ya verilən məlumata görə, nazir çıxışında bildirib ki, bu gün İƏT ölkələri dinamik iqtisadiyyata malik olaraq, biznes mühitinin yaxşılaşdırılması, rəqabət və innovasiyalar üçün açıqlığa səy göstərən ölkələr kimi tanınırlar: “Ticarət və sərmayələr axınının, kommersiya əlaqələrinin və regionlararası nəqliyyat infrastrukturunun inkişafının artması ilə regional inteqrasiya səylərinin dərinləşməsinin müşahidə olunması bizdə məmnunluq doğurur. Bunlar ümidverici göstəricilərdir, amma biz bunları daha da inkişaf etdirməli və digər qarşılıqlı iqtisadi imkanları araşdırmalıyıq. Biz bu qənaətdəyik ki, bu çərçivədə əsas diqqət ticarət və nəqliyyatın asanlaşdırılmasına, o cümlədən sərhəd keçid prosedurlarının sadələşdirilməsinə yönəldilməlidir. Bu tədbirlər bizə mövcud regional fiziki infrastrukturdan tam şəkildə faydalanmağa imkan yarada bilər. Regional infrastrukturun inkişafı əməkdaşlığa dair gündəliyimizin prioritet məqsədi olmalıdır. İƏT xüsusilə dəmir yolu xətlərinin və onunla bağlı olan digər infrastrukturun modernləşdirilməsi, habelə ümumi dəmir yolu şəbəkəsinin yaradılması və onun Avropa və Yaxın Şərq dəmir yolu şəbəkələri ilə əlaqələndirilməsini hədəf seçməlidir”.

Nazir deyib ki, 2013-cü ildə Azərbaycan öz peykini səmaya çıxarmaqla, kosmik ölkələr klubuna qoşulub və Dünya İqtisadi Forumunun “2013-2014-cü illər üzrə qlobal rəqabətlilik hesabatı”na əsasən 148 dünya dövləti arasında qlobal rəqabətlilik indeksinə görə 39-cu olub: “Bu qəbildən olan milli nailiyyətlər region daxilində qarşılılıqlı fəaliyyətin təşviq edilməsi baxımdan əlavə imkanlar yaradır. Bu baxımdan, məmnunluqla qeyd etmək istərdim ki, Azərbaycan Əfqanıstanda informasiya və kommunikasiya texnologiyaları və elektron hökumət konsepsiyasının inkişafına töhfə vermək niyyətində olduğunu bildirib. Bundan əlavə, biz ümid edirik ki, BMT qətnaməsi və fərdi olaraq 21 dövlət, o cümlədən əksər İƏT üzv ölkələri tərəfindən dəstəklənmiş şərq-qərb arasında yüksək sürətli optik lifli internet zolağının yaradılmasına dair Azərbaycanın təşəbbüsü regiondaxili və regionlararası əməkdaşlığımızda yeni səhifə açacaq”.

E. Məmmədyarov bəyan edib ki, Azərbaycan təşkilatın effektiv və səmərəli quruma çevrilməsi üçün İƏT-də islahatların aparılması prosesini dəstəkləyir: “Qarşılıqlı təmasların gözlənilən təsirini, eləcə də müvafiq sahələrdə ayrı-ayrı ölkələrin müqayisəli üstünlüyü nəzərə alaraq, əməkdaşlıq üçün prioritet sahələrin prioritet siyahısının müəyyənləşdirilməsinə ehtiyacın olduğunu qəbul edirik. Elm və tədqiqat sahəsində əməkdaşlığın genişləndirilməsi, həmçinin, regional inkişafa əsaslanan biliklərin təşviqi istiqamətində müsbət irəliləyiş yarada bilər. Ona görə də, biz inanırıq ki, İƏT Tədqiqat Mərkəzinin yaradılması və İƏT Tədqiqat Mərkəzinin Nizamnaməsinin erkən qəbul edilməsi bu məqsədlərə nail olmaq üçün katalizator rolunu oynaya bilər. Digər tərəfdən, təşkilatın fəaliyyəti üçün proqnozlaşdırma və davamlı maliyyələşmə çox əhəmiyyətli məsələdir. İƏT-in daimi büdcəsinə vaxtaşırı ödənişlər üçün ehtiyacın olduğunu qəbul edərək, İƏT və onun institutlarının maliyyə vəsaiti toplamaq fəaliyyətlərinin əhəmiyyətini qiymətləndirməyə bilmərik”.

E. Məmmədyarov xüsusi vurğulayıb ki, hər bir üzv dövlətin təhlükəsizliyi və sabitliyi ayrılmaz şəkildə digər üzv dövlətin təhlükəsizliyi ilə bağlıdır: “Həlli uzanmış münaqişələri tənzimləmədən və regionda təhlükəsizlik və sabitliyi təmin etmədən, İƏT hərtərəfli regional əməkdaşlıqdan tam şəkildə fayda götürə bilməyəcək. Amma təəssüf ki, biz bəzi hallarda bu məsələlərin tələb etdiyi şəkildə onlara münasib diqqət ayırmırıq. İƏT çərçivəsində Cənubi Qafqaz həlli uzanan münaqişələrdən əziyyət çəkən digər bir regiondur. Ermənistan-Azərbaycan münaqişəsi hələ də əsas qeyri-sabitlik mənbəyi, regional inkişafa və tam miqyaslı regional əməkdaşlığa mane olaraq qalmaqdadır. Azərbaycanın suverenliyi, ərazi bütövlüyü və beynəlxalq səviyyədə tanınmış sərhədlərinin toxunulmazlığının bərpa edilməsi ilə mən inanıram ki, regionda hər bir tərəf üçün qarşılıqlı uduşlu inkişaf şəraiti yarana bilər”.