Millimizdən 3-cü fiasko – antirekordun bir addımlığında

Qadın voleybolçulardan ibarət Azərbaycan millisi AVRO-2021-də qrupda qalıb.

Apasport.az saytının məlumatına görə, yığmamız son oyununun nəticəsindən asılı olmayaraq mübarizəni davam etdirmək şansını itirib.

Buna komandamızın ardıcıl quru hesablı məğlubiyyətləri səbəb olub. Keçirdiyi 4 oyunda nəinki xal, hətta set də qazanmayan Vüqar Əliyevin yetirmələri yalnız qrup sonuncusu olmamağa ümid edə bilər. Bunun özü də möcüzəyə bağlıdır.

Belçika, Bosniya və Herseqovina, Rusiya və Serbiyaya 0:3 hesabı ilə uduzan komandamız üçün Fransa ilə görüş təsəlliverici xarakter daşıyır.

Ardıcıl 9-cu dəfə Avropa çempionatının final mərhələsində çıxış edən yığmamız 3-cü dəfə qrup səddini adlaya bilmir. 6 dəfə bunu bacaran komanda yalnız 2013-cü və 2015-ci illərdə qrupdan çıxmayıb.

Lakin həmin illərdə qrupda 6 deyil, 4 komanda çıxış edib. Yığmamız da 3 məğlubiyyətlə 4-cü yeri tutub. Hər iki halda millimiz evə heç olmasa 1 setdə qalib gələrək qayıdıb. Bu dəfə isə hələ set də yoxdur.

Mütləq antirekord olmaması üçün yığmamız Fransanı heç olmasa bir setdə udmalıdır. Rəqibin güclü olmaması buna imkan versə də, millimizdən də nə isə gözləmək çətindir. Uduza-uduza gedən Əliyevin yetirmələrinin çıxışı antirekorddan qaçmağa ümid üçün də əsas vermir.

il	O	Q	M	S/F
2005	7	4	3	12-11	1/2 final	IV
2007	8	1	7	4-21	İkinci mərhələ	XII
2009	8	1	7	8-23	Pley-off	XII
2011	4	1	3	6-10	Pley-off	IX
2013	3	0	3	1-9	İlkin mərhələ	XV
2015	3	0	3	1-9	İlkin mərhələ	XIV
2017	6	4	2	15-7	1/2 final	IV
2019	6	4	2	12-10	1/8 final	X
2021	4	0	4	0-12	İlkin mərhələ