Azərbaycan Milli Paralimpiya Komitəsi ilə “Paris-2024” Təşkilat Komitəsi arasında görüş
22 mart 2023 05:11 (UTC +04:00)

Azərbaycan Milli Paralimpiya Komitəsi ilə “Paris-2024” Təşkilat Komitəsi arasında görüş

Fransanın paytaxtında “Paris 2024” Yay Olimpiya və Paralimpiya Oyunlarının Təşkilat Komitəsinin ofisində Azərbaycan Milli Paralimpiya Komitəsi və “Paris- 2024” Təşkilat Komitəsinin üzvləri arasında görüş keçirilib.

Lent.az xəbər verir ki, Azərbaycan Milli Paralimpiya Komitəsinin prezidenti, Beynəlxalq Görmə Məhdudiyyətli İdmançılar Assosiasiyasının (IBSA) vitse-prezidenti İlqar Rəhimov görüş zamanı ölkəmizdə paralimpiya hərəkatının inkişafı, əldə edilmiş nailiyyətlər və gələcək işlər barədə məlumat verib.

Komitə prezidenti bildirib ki, Tokioda keçirilmiş sonuncu Yay Paralimpiya Oyunlarında millimiz 14 qızıl, 1 gümüş və 4 bürünc olmaqla ümumilikdə 19 medal qazanaraq, oyunları ilk onluqda başa vurub. İ. Rəhimov qeyd edib ki, məqsəd Tokioda əldə edilmiş nəticələri ən azı təkararlmaqdır və bunun üçün Komitə lazım olan istiqamətdə işlər aparır.

Görüşdə bildirilib ki, Azərbaycan milli komandasının Paris 2024-də 8 idman növündə 50 idmançı ilə təmsil olunacağı gözlənilir.

İlqar Rəhimov IBSA-nın fəaliyyəti barədə də məlumat verib, oyunlarda görmə məhdudiyyətli idmançıların iştirakı üçün yaradılacaq şəraitə dair müzakirələr aparıb.

“Paris 2024” Təşkilat Komitəsinin beynəlxalq əlaqələr üzrə rəhbəri Sofi Lorant bildirib ki, Azərbaycan Milli Paralimpiya Komitəsi ilə əlaqələrin genişləndirilməsi hər iki tərəf üçün müsbət xarakter daşıyır. O, Azərbaycanın paralimpiya hərəkatına verdiyi böyük töhfələrdən söz açıb və bu təcrübənin digər ölkələrlə də bölüşülməsinin vacibliyini vurğulayıb.

Fransa Milli Paralimpiya Komitəsinin idman direktoru Jan Miniyer ölkəmizdə paralimpiya hərəkatının inkişafını yüksək qiymətləndirərək qeyd edib ki, Fransa Paralimpiya Komitəsi Azərbaycan Milli Paralimpiya Komitəsi ilə qarşılıqlı təcrübə mübadiləsini aparmaqda maraqlıdır.

Görüş zamanı Təşkilat Komitəsinin üzvləri tərəfindən “Paris 2024” Yay Paralimpiya Oyunlarına dair təqdimat nümayiş olunub. Tərəflər arasında gələcək əməkdaşlığa dair ətraflı fikir mübadiləsi aparıblar.

Görüşdə Azərbaycan Milli Paralimpiya Komitəsinin (AMPK) prezidenti, IBSA-nın vitse-prezidenti İlqar Rəhimov, beynəlxalq əlaqələr və marketinq şöbəsinin müdiri Rüfət Hacılı, Azərbaycanın Fransadakı səfirliyinin nümayəndəsi Alı Xələfli, “Paris 2024” Təşkilat Komitəsinin beynəlxalq əlaqələr üzrə rəhbəri Sofi Lorant, Fransa Milli Paralimpiya Komitəsinin idman direktoru Jan Miniyer, Fransa Əlil İdmançılar Federasiyasının vitse-prezidenti Qael Riviyere, Milli Paralimpiya Komitəsinin mətbuat katibi Azər Tapdıqov və Milli Paralimpiya Komitəsinə dəstək göstərəcək Azərbaycanlı könüllülər iştirak ediblər.

1 2 3 4 5 İDMAN XƏBƏRLƏRİ
# 2220
avatar

Oxşar yazılar