Rusiya məhkəməsi İbrahim Musayev barədə qərar çıxardı

Yaroslavl vilayət məhkəməsində hakim Yuri Zuyevin sədrliyi ilə keçirilən iclasında Naxçıvan MTN-nin sabiq əməkdaşı İbrahim Musayev barədə qərar çıxarılıb.

APA-nın məlumatına görə, məhkəmə adı çəkilən şəxsin Azərbaycana ekstradisiyasına qərar verib.

Qeyd edək ki, İ. Musayev İran lehinə casusluqda ittiham olunmuş, sonradan Naxçıvan MTN həbsxanasında dünyasını dəyişmiş Turac Zeynalovun həyat yoldaşını qətlə yetirmək barədə tapşırıq aldığını, lakin bu tapşırığı yerinə yetirilməkdən imtina etdiyini bildirib. Naxçıvan MTN isə bəyanat yayaraq, İ. Musayevlə heç bir əlaqəsi olmadığını qeyd edərək onu dələduz və fərarı adlandırıb. Naxçıvan MTN-nin açıqlamasında T. Zeynalovun xərçəng xəstəliyindən vəfat etdiyi bildirilir. 2012-ci ilin sentyabrında İ. Musayev həyat yoldaşı ilə Rusiyaya gələrək, bu ölkədə qaçqın statusunu almağa cəhd göstərib. Lakin Rusiya müvafiq orqanları onun Azərbaycan tərəfindən axtarışa verildiyi əsas gətirərək, müraciəti rədd ediblər.