“Azadliq” Tağı Əhmədova hər ay 400 manat ödəyəcək
24 aprel 2013 19:46 (UTC +04:00)

“Azadliq” Tağı Əhmədova hər ay 400 manat ödəyəcək

“Azadlıq” qəzeti ilə Bakı Metropoliteninin rəisi Tağı Əhmədovun hüquqi nümayəndəsi arasında 30 min manatlıq cərimənin hissə-hissə ödənilməsi haqda razılıq əldə olunub.

Lent.az-ın “mediaforum.az” saytına istinadən verdiyi məlumata görə, Tağı Əhmədovun hüquqi nümayəndəsi Nigar Rəhimzadə deyib ki, Bakı Metropoliteninin rəisi cərimənin ödənilməsində israrlıdır.

Nigar Rəhimzadə qeyd edib ki, “Azadlıq” qəzetinin rəhbərliyi müraciət edib, qəzetin vəziyyətinin ağır olduğunu bildirib, məsələnin təkzib və üzrxahlıq mətni verilməsi ilə həllini təklif ediblər: “Məsələni Tağı müəllimlə müzakirə etdim, qəzetin vəziyyətinin ağır olması haqda deyilənləri nəzərinə çatdırdım. Tağı müəllim dedi ki, lap 5-10 ilə olsa da cərimə ödənməlidir. Bildirdi ki, nə qədər bacarırlar, hissə-hissə ödəsinlər. Bu cərimə Tağı Əhmədova və Bakı Metropoliteninə deyil, uşaq evinə köçürüləcək. Mənə bir uşaq evi tapmağı, bank hesabını öyrənməyi və cərimənin hissə-hissə həmin uşaq evinin bank hesabına köçürülməsini tapşırdı. Amma cərimədən tamamilə imtina olunması mümkün deyil. Tələblər qüvvədə qalır. Tağı Əhmədovun “Azadlıq” qəzetinə edə biləcəyi güzəşt cərimənin hissə-hissə ödənilməsidir”.

Nigar Rəhimzadə qeyd edib ki, cərimənin ödənilməsi qrafikində razılıq əldə olunandan sonra məhkəmə icraçılarından qəzetin bank hesabı üzərinə qoyulan həbsin qaldırılmasını istəyəcəklər: “Azadlıq” qəzetinin redaktoru Sücəddin Şərifovla danışdım, ondan məhkəmə icraçılarının telefon nömrələrini almışam. Məhkəmə icraçıları ilə danışacam. Cərimənin məbləği 30 min manatdır. Sücəddin Şərifov bildirdi ki, hər ay 400 manat ödəyə bilərlər, qəzetin imkanı ancaq buna çatır. Bununla bağlı razılığa gəldik. Hər ay 400 manat ödənilsə, 30 min manatı ödəmək üçün təxminən 6 il lazımdır. İndi qrafik tutulmalıdır. Bunu da qəzet və məhkəmə icraçıları öz aralarında həll etməlidirlər”.

“Azadlıq” qəzetinin redaktoru Sücəddin Şərifov da “mediaforum.az” saytına bildirib ki, bank hesabı üzərindən həbsin götürülməsi və cərimənin müəyyən qrafik üzrə hissə-hissə ödənilməsi üçün icra məmurlarına müraciət ediblər: “Onlar da dedilər ki, iddiaçı tərəfin razılığı olmalıdır. Tağı Əhmədovun hüquqi nümayəndəsi razılıq verib. Amma məsələ rəsmiləşməyib. Qəzetin bank hesabı üzərindəki həbs qalır”.

Xatırladaq ki, Bakı Metropoliteninin rəisi Tağı Əhmədov “Azadlıq”ı bu qəzetin 8 aprel 2012-ci il sayında çıxmış “Tağı Əhmədov 5 qəpikləri mənimsədi” sərlövhəli yazıya görə məhkəməyə verib, qəzetin 200 min manat cərimələnməsini istəyib. Yasamal Rayon Məhkəməsi 2012-ci ilin iyun ayında metropoliten rəisinin yazıdan ciddi mənəvi zərər gördüyü əsası ilə qəzetin üzərinə 30 min manat təzminat ödəmək vəzifəsi qoyan qərar çıxarıb. Bu ay Yasamal Rayon Məhkəməsinin qərarı ilə “Azadlıq” qəzetinin bank hesabına həbs qoyulub.

# 1507
avatar

Oxşar yazılar