Bəzi insanlar söhbət zamanı səsini qaldırır, çünki onları heç kimin dinləmədiyini düşünürlər. Davamlı olaraq mübahisələrdə qışqıran insanla ünsiyyət qurmaq olduqca yorucu ola bilər. Psixoloq Deyv Kandiff bildirib ki, belə vəziyyətdə dərhal reaksiya vermək əvəzinə, ilk növbədə qarşı tərəfin niyə bu cür davrandığını anlamağa çalışmaq lazımdır.
Lent.az bu 3 cümləni təqdim edir:
Hər kəs eyni səbəbdən səsini qaldırmır
Səs tonunun yüksəlməsi çox vaxt qəzəb və aqressiya ilə əlaqələndirilsə də, bu hər zaman belə olmur. Bəzi insanlar özlərini diqqətdən kənarda qalmış hiss etdikləri və ya dinlənilmədiklərini düşündükləri üçün qışqırmağa başlayırlar. Digərləri isə bunu güclü stress səbəbindən edir və ya ailədə öyrəşdikləri ünsiyyət tərzini davam etdirirlər. Mütəxəssislər bildirirlər ki, qarşı tərəfin niyyətini əvvəlcədən pis qiymətləndirmək əvəzinə vəziyyəti müşahidə etmək daha doğrudur. İnsan hər zaman belə danışır, yoxsa yalnız müəyyən situasiyalarda? Emosiyaları tədricən artır, yoxsa bu onun adi danışıq tərzidir? Bu sualların cavabı vəziyyəti düzgün qiymətləndirməyə kömək edə bilər.
Emosiyalar yüksələndə sərhəd qoyun
Əgər söhbət qışqırığa çevrilibsə, həmin anda qarşı tərəfi məntiqli arqumentlərlə inandırmağa çalışmaq adətən nəticə vermir. Güclü emosiyalar zamanı insan beyni məlumatı rasional şəkildə qəbul etməkdə çətinlik çəkir və "qaç və ya mübarizə apar" reaksiyası işə düşür. Belə məqamlarda mübahisəni davam etdirmək əvəzinə, sərhədlərinizi sakit şəkildə ifadə etmək daha faydalıdır. Məsələn, belə cümlələr işlədə bilərsiniz:
"İkimiz də sakitləşəndən sonra danışaq".
"Mən səni dinləmək istəyirəm, amma mənə qışqıranda bunu edə bilmirəm".
"Bu söhbətə bir az sonra yenidən qayıdaq".
Psixoloqun sözlərinə görə, bu ifadələr münaqişəni daha da böyütmür, əksinə, bu ünsiyyət formasını qəbul etmədiyinizi nəzakətlə göstərir. Bəzən sadəcə dinləmək kifayət edir. Psixoloqlar hesab edirlər ki, bəzi insanlar yalnız dinlənilmədiklərini hiss etdikləri üçün səsini qaldırırlar. Qarşı tərəf onun sözlərinə diqqət yetirildiyini hiss etdikdə gərginlik çox vaxt azalır. Bunun üçün göz təmasını qorumaq, insanın fikrini yarımçıq kəsməmək və dediklərini qısa şəkildə ümumiləşdirərək başa düşdüyünüzü göstərmək faydalı ola bilər. Mütəxəssislər vurğulayırlar ki, kimisə dinləmək onunla razılaşmaq demək deyil. Bu, sadəcə söhbətə ciddi yanaşdığınızı göstərən bir siqnaldır.
Uşaqlıqdan qalan vərdiş ola bilər
Bəzi insanlar isə ümumiyyətlə səsinin yüksək olduğunu fərq etmirlər. Çünki böyüdükləri ailədə emosional və ucadan danışmaq adi ünsiyyət forması olub və bunu mübahisə kimi qəbul etməyiblər. Belə hallarda mübahisə zamanı bunu qabartmaq əvəzinə, emosiyalar sakitləşəndən sonra mövzuya qayıtmaq daha məqsədəuyğun hesab edilir. Mütəxəssislər qarşı tərəfi ittiham etməkdənsə, öz hisslərinizi ifadə etməyi tövsiyə edirlər. Məsələn, belə deyə bilərsiniz:
"Səsini qaldıranda dediklərinə diqqətimi toplamaq mənim üçün çətin olur".
"Sənin əsəbi olub-olmadığını bilmirəm, amma mən bunu mənə qarşı hücum kimi qəbul edirəm".
"İkimiz də sakit danışsaq, səninlə ünsiyyət qurmaq mənim üçün daha rahat olar".
Psixoloqların fikrincə, çətin söhbətlər zamanı ən vacib qaydalardan biri tələsməmək və emosiyalarınızı idarə etmək üçün özünüzə bir qədər vaxt verməkdir.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
