Ali Neft Məktəbi “Total E&P Azerbaijan” la protokol imzaladı

Bakı Ali Neft Məktəbinin rektoru Elmar Qasımov və “Total E&P Azerbaijan” şirkətinin baş meneceri Kristian Jüdiselli arasında “Əməkdaşlıq Protokolu” imzalanıb. Lent. az-ın məlumatına görə, imzalanma mərasimində Fransanın Azərbaycan Respublikasındakı fövqəladə və səlahiyyətli səfiri Paskal Mönye və digər qonaqlar iştirak ediblər. Sənəddə “Total E & P Azerbaijan” şirkətinin dəstəyi ilə Bakı Ali Neft Məktəbi və Fransanın neft-qaz və kimya yönümlü ali təhsil müəssisələri arasında əməkdaşlığın qurulması və başqa məsələlər öz əksini tapıb.

Tədbirdə çıxış edən rektor bildirib ki, artıq dünyaya inteqrasiya etmiş Azərbaycan Respublikası üçün beynəlxalq standartlara cavab verən kadrların hazırlanması prioritet məsələyə çevrilib. Prezident İlham Əliyevin rəhbərliyi ilə yüksəkixtisaslı kadrların yetişdirilməsi sahəsində bir çox uğurlu təhsil islahatları həyata keçirilməkdədir: “Dünyanın enerji sahəsində tanınmış şirkətləri və təhsil müəssisələri ilə əməkdaşlıq Bakı Ali Neft Məktəbi üçün mühüm əhəmiyyət kəsb edir. Bu baxımdan böyük təcrübəyə malik “Total E&P Azerbaijan” şirkəti ilə əməkdaşlıq bizim üçün olduqca vacibdir”.

Səfir P. Mönye qeyd edib ki, dinamik inkişaf edən Azərbaycanda beynəlxalq standartlara cavab verən belə bir ali təhsil müəssisəsinin yaradılması və qısa vaxt ərzində yüksək nailiyyətlər əldə olunması təqdirəlayiq haldır.

“Total E&P Azerbaijan” şirkətinin baş meneceri Kristian Jüdiselli çıxış edərək bildirib ki, Şirkət Azərbaycanda təhsil və kadrların hazırlanması sahəsində bir çox layihələrin həyat keçirilməsinə dəstək verib.