Orta və iri tutumlu marşrutlar Bakının mərkəzinə buraxılmır

Bu gün səhər saatlarından orta və iri tutumlu marşrut avtobuslarının Bakı şəhərinin mərkəzinə daxil olması dayandırılıb.

«APA-ECONOMICS»in hadisə yerində olan əməkdaşının verdiyi məlumata görə, Nəqliyyat Nazirliyinin əməkdaşları şəhərin müxtəlif hissələrində orta və iri tutumlu avtobusları saxlayaraq sərnişinləri mənzil başına çatmadan avtobuslardan düşürüb, avtobusları geri qaytarıblar.

Nəticədə paytaxtın müxtəlif ərazilərində - «Neftçilər» xəstəxanasının, metronun «Xətai» və «Nizami» stansiyalarının qarşısında sərnişin sıxlığı yaranıb. Problemin ən çox yaşandığı ərazi isə «Neftçilər» xəstəxanasının qarşısı olub. Paytaxtın mərkəzi hissəsinə işləyən avtobusları saxlayan Nəqliyyat Nazirliyinin müfəttişləri kobud hərəkətlərlə sərnişinləri avtobuslardan boşaldıb, etiraz edən sürücülərin sənədlərini alıblar. Sürücülər özləri də nəqliyyat müfəttişlərinin bu hərəkətlərini anlamadıqlarını, bu barədə nə onlara, nə də marşrut sahiblərinə əvvəlcədən heç bir xəbərdarlığın olmadığını bildiriblər. Müfəttişlər özləri də hərəkətləri ilə bağlı heç bir izahat verməyiblər.

Məsələyə Nəqliyyat Nazirliyindən münasibət öyrənmək mümkün olmayıb. «Bakı Sərnişin Nəqliyyatı» MMC-dən isə «APA-ECONOMICS»ə avtobusların saxlanılmasını profilaktik tədbirlərlə əlaqələndirsələr də, bu tədbirlərin nədən ibarət olduğunu açıqlamayıblar. Qurumdan onu da bildiriblər ki, nəqliyyat müfəttişləri yalnız orta və kiçik tutumlu avtobusları şəhərin mərkəzinə daxil olmasını qadağan ediblər. Bu barədə marşrut sahiblərinə əvvəlcədən xəbərdarlıq olunub, onlara orta tutumlu avtobusları iritutumlularla əvəz eləmək tapşırığı verilib.