Bakı Ali Neft Məktəbində Nobel mükafatı laureatı ilə görüş keçirilib - FOTO

Lent.az-ın verdiyi məlumata görə, Bakı Ali Neft Məktəbinin rektoru Elmar Qasımov bildirib ki, rəhbərlik etdiyi məktəb prezidentin sərəncamı ilə Azərbaycan Respublikası Dövlət Neft Şirkətinin strukturunda yaradılıb. Rektor deyib ki, Bakı Ali Neft Məktəbi artıq Böyük Britaniyanın Heriot-Vatt Universiteti ilə əməkdaşlıq əlaqələri qurub, ötən aydan isə ali məktəbə qəbul olmuş 116 tələbə tədris prosesinə qoşulub. E. Qasımov dünya şöhrətli alimin Azərbaycanın ən gənc ali təhsil müəssisəsinə gəlməsindən şad olduğunu bildirib, ona elm və təhsil sahəsində əlaqələrin genişləndirilməsində fəal iştirakına görə Elmi Şuranın qərarı ilə “Bakı Ali Neft Məktəbinin Fəxri Doktoru” adının verildiyini elan edib və diplomu professora təqdim edib.

Daha sonra çıxış edən D. Şextman qeyd edib ki, Azərbaycan neftlə zəngin olduğu üçün burada kimyəvi mühəndislik və digər texniki sahələrdə kadrlar hazırlanmasına ehtiyac var. Bu baxımdan Bakı Ali Neft Məktəbinin açılması böyük əhəmiyyət kəsb edir. O qeyd edib ki, Bakı Ali Neft Məktəbinin hazırladığı kadrlar sonradan iqtisadiyyatın inkişafına dəstək olacaqlar və ölkə üçün yeni məhsulları, texnologiyaları inkişaf etdirəcəklər. D. Şextman Azərbaycanın sürətli inkişaf yolunda inamla addımladığını vurğulayıb, Bakı Ali Neft Məktəbinin kollektivinə uğurlar diləyib və fəaliyyətinə verilən yüksək qiymətə görə öz minnətdarlığını bildirib.

Anar