Sülhəddin Əkbər: “2003-2005-ci illərdə Müsavatdan minlərlə insan gedib”

“2003-2005-ci illərdə Müsavatdan minlərlə insan gedib. Bu məsələ dəfələrlə Müsavat Divanında müzakirə olunub. Biz partiyadakı bu tənəzzülün qarşısını ala bilməmişik. Partiyanın Məclisinin sədri olaraq da, təşkilati məsələlərdən mənim də xəbərim var”. Bunu “Azadlıq” radiosuna müsahibəsində Müsavat Məclisinin sabiq sədri Sülhəddin Əkbər deyib.

S, Əkbər bildirib ki, Müsavatda “İsa Qəmbəri özündən çox istəyənlər” peyda olub: “Onlar Müsavat başqanı olmaqla bağlı iddialarını reallaşdıra bilmədikləri üçün indi İsa bəyin başqanlıqda qalması məsələsini gündəmə gətiriblər”.

S. Əkbər Müsavat Partiyasının AXCP ilə birləşməsi ilə bağlı prosesi davam etdirməsi ilə bağlı bəyanatını “imitasiya” adlandırıb. Onun sözünə görə, Müsavat Divanının son iclasında AXCP ilə Müsavatın birləşməsi məsələsinin zamana buraxılması, prosesin mərhələlərlə həyata keçirilməsi ilə bağlı qərar qəbul edib.

S. Əkbər Əli Kərimlinin birləşmiş partiyanın sədri olmasının tərəfdarı olduğunu təsdiqləyib. O bildirib ki, belə olacağı təqdirdə İsa Qəmbəri siyasi-mənəvi lider və ya Xalq Məclisinin sədri, həm də 2013-cü ildə birləşmiş partiyanın prezidentliyə namizədi olmasını təklif etdiyini deyib.