4 bölgədə soyuducu anbarlar tikiləcək

Yeni yaradılacaq anbarlardan sahibkarlarla yanaşı fermerlər də istifadə edəcək

İqtisadi İnkişaf Nazirliyi ölkənin 4 regionunda - Mərkəzi Aran, Qərb, Cənub və Şimal bölgəsində yeni soyuducu anbarların tikintisinə başlayacaq. Kənd təsərrüfatı məhsullarının saxlanması üçün nəzərdə tutulan anbarların hər birinin tutumu 2 min tondan çox olacaq.

Nazirlikdən Lent.az-a bildiriblər ki, soyuducu anbarların tikintisi “2009-2013-cü illərdə regionların sosial-iqtisadi inkişafı üzrə Dövlət Proqramı” çərçivəsində həyata keçirilir. Artıq məhsulların saxlama kameralarının tikintisi üçün iqtisadi təhlillər də aparılıb. Həmçinin bir sıra rayonlarda emal və sənaye müəssisələrinin yaradılması üzrə sahibkarlıq subyektlərinə investisiya layihələrinin qəbulu məlumatlar da təqdim olunub. Şərtlərə əsasən, sahibkarlıq subyektləri özlərinin investisiya layihələrini iyulun 15-dək Sahibkarlığın İnkişafına Kömək Milli Fonduna təqdim edilməlidirlər.

Nazirlikdə bildirirlər ki, yeni yaradılacaq soyuducu anbarlardan təkcə sahibkarlar deyil, fermerlər də istifadə edə biləcək. Həmin soyuducu anbarların növbəti meyvə-tərəvəz məhsulu mövsümünədək istifadəyə veriləcəyi planlaşdırılıb. Belə olan halda gələn il bu saxlama kameralarında ümumilikdə 10 min tonadək məhsul saxlamaq mümkün olacaq.

Elxan SALAHOV