“Əli market” vergi borcundan yayınıb

Bakı şəhəri Vergilər Departamentinin Vergi Borclarının Alınması İdarəsinin əməkdaşları Xəzər rayonu, Buzovna qəsəbəsi, ev B-2001 123 ünvanda yerləşən, fiziki şəxs Cavadov Zakir Ağacavad oğluna məxsus (VÖEN: 1200484302) “Əli market” ərzaq mağazasında əmlakın siyahıya alınması tədbirlərini həyata keçiriblər.

Lent.az-ın Vergilər Nazirliyinin rəsmi saytına istinadən verdiyi məlumata görə, Zakir Cavadovun fəaliyyəti vergi orqanı əməkdaşları tərəfindən yoxlanılarkən, onun bu ilin avqust ayında 4 min 486 manat məbləğində vergi borcunun yarandığı müəyyən edilib.

Vergi ödəyicisinə avqust ayının 13-də borc bildirişi göndərilib, sentyabr ayının 17-də isə Vergi Məcəlləsinin 89-cu maddəsinə əsasən yaranmış vergi borcunun ödənilməsini təmin etmək üsulu kimi Zakir Cavadova məxsus əmlakın siyahıya alınması haqqında qərar çıxarılıb. Sentyabr ayının 18-də vergi orqanı əməkdaşları tərəfindən vergi ödəyicisinə məxsus “Əli” ərzaq mağazasında 4 min 505 manat məbləğində müxtəlif növ alkoqollu içki və tütün məmulatlarının, o cümlədən məişət texnikası və avadanlığının müvafiq qaydada siyahıya alınması həyata keçirilib.