Böyükağa Hacıyev: “Rəqiblərimiz, Xorvatiya, Almaniya, Rusiya, Polşa...” - MÜSAHİBƏ

“Neftçi”nin baş məşqçisi Böyükağa Hacıyev komandasının Türkiyədə keçirəcəyi hazırlıq barədə futbol klubunun rəsmi saytına müsahibə verib. Lent.az həmin müsahibəni təqdim edir:

- “Neftçi” yanvarın 11-dən hazırlığını Türkiyədə davam etdirəcək. İstərdik ki, hazırlıq planlarınız haqqında danışasınız...

- Ötən mövsüm olduğu kimi, bu dəfə də qış fasiləsi hazırlığını Türkiyənin Antalya şəhərində keçəcəyik. Yanvarın 23-dək davam edəcək ilk mərhələdə əsasən fiziki məşqlərə üstünlük verəcəyik. Daha sonra futbolçulara 2 gün istirahət veriləcək. Yanvarın 25-dən isə hazırlığın ikinci mərhələsi başlayacaq ki, burada da komandanın taktiki-texniki keyfiyyətlərinin yaxşılaşdırılması istiqamətində çalışacağıq.

- Yəqin ki, bu vaxt ərzində komandamız yoxlama oyunları da keçirəcək.

- Hazırlıq dövründə yoxlama oyunlarının təşkili mütləqdir. Ümumilikdə 4-5 oyun keçirmək niyyətindəyik. Bu həm oyun təcrübəsinin artırılması, həm də hazırlıq prosesinin faydasını görmək üçündür. Rəqiblərimiz, Xorvatiya, Almaniya, Rusiya, Polşa və bu kimi ölkələrin təmsilçiləri olacaq.

- Hazırlıq zamanı komandaya yeni futbolçular cəlb olunacaqmı?

- Seleksiyaçı məşqçilər bu istiqamətdə işləri davam etdirirlər. Onların təklif edəcəkləri futbolçulara baxacağam və bizi qane edən səviyyədə olsalar, komandaya cəlb olunacaqlar.

- “Neftçi” mövsümün ilk yarısında 30 oyun keçirdi və sona yaxın futbolçularda yorğunluq hiss olunurdu. Hazırda heyətdəki futbolçuların durumu necədir?

- Futbolçuların dincəlmək üçün kifayət qədər vaxtı oldu. Artıq onlar yorğunluğu üzərlərindən atıblar. Məqsədimiz Azərbaycan çempionatının və kubokunun qalibi olmaqdır. Avrokuboklarda isə özümüzə məxsus nəticəni daha da yaxşılaşdırmaq niyyətindəyik.