Premyer Liqanın ən yaxşı futbolçusu “Mançester Yunayted”də

Lent.az-ın “qırmızı şeytanlar”ın rəsmi saytına istinadən verdiyi məlumata görə, 29 yaşlı hücumçu tibbi müayinədən keçdikdən və şəxsi müqavilə şərtlərini həll etdikdən sonra müqaviləyə imza atacaq.

Ötən mövsüm Premyer Liqanın ən yaxşı oyunçusunun keçidi “mankunianlar”a 22,5 milyon funt sterlinqə başa gəlib. Van Persi ilə “Mançester Siti”, Fransa PSJ-si və İtaliya “Yuventus”u da maraqlanırdı. Onun özü isə “Arsenal”la 2012-2013-cü il mövsümünün sonunda başa çatacaq müqaviləsini uzatmayacağını bildirirdi. Futbolçunu baş məşqçi Arsen Venger və klub rəhbərliyinin seçdiyi inkişaf istiqaməti qane etmirdi.

Qeyd edək ki, Robin van Persi “Arsenal”da 2004-cü ildən çıxış etməyə başlayıb. O, Sesk Fabreqasın İspaniya “Barselona”sına gedişindən sonra komandanın kapitanı təyin olunub. Hollandiyalı hücumçu ötən mövsüm 30 qolla Premyer Liqanın bombardiri sayılıb. Lakin “Arsenal” 3-cü, “Mançester Yunayted” 2-ci yeri tutub.