Bakıda həbs edilən qadın ABU-nun əməkdaşı imiş

Bir neçə ay əvvəl Bakıda həbs edilmiş qadının Azərbaycan Beynəlxalq Universitetinin (ABU) sabiq müəllimi olması məlum olub. Bu barədə APA-ya Binəqədi rayon Polis İdarəsindən bildirilib.

Məlumata görə, Cinayət Məcəlləsinin 178-ci (dələduzluq) maddəsi ilə axtarışda olan, Göyçay rayon sakini, 1970-ci il təvəllüdlü Afaq Rafiq qızı İbrahimova artıq fəaliyyət göstərməyən universitetin əməkdaşı olub. Xeyli sayda vətəndaşa qarşı dələduzluq etməkdə təqsirləndirilən A. İbrahimovanın həbsinin ABU-nun sabiq rektoru Elşad Abdullayevlə bağlı olub-olmadığı məlum deyil.

Qeyd edək ki, avqustun 8-də Bakı Şəhər Baş Polis İdarəsi A.İbrahimovanın saxlanılması ilə bağlı məlumat yayıb. Məlumatda bildirilir ki, Binəqədi RPİ CAŞ və 5-ci PB əməkdaşlarının keçirdikləri əməliyyat-axtarış tədbirləri nəticəsində AR CM-in 178-ci (dələduzluq) maddəsi ilə axtarışda olan Afaq İbrahimova tutulub.