Baş prokuror zorlandığını deyən 18 yaşlı qızla bağlı xüsusi tapşırıq verib

İş Balakən rayon Prokurorluğundan alınıb, Şəki rayon Prokurorluğuna göndərilib

Qohumu tərəfindən zorlandığını iddia edən Günel (ad şərtidir) adlı Balakən rayon sakininin şikayət ərizəsi ətrafında toplanmış materiallar Baş prokuror Zakir Qaralovun xüsusi tapşırığına əsasən yoxlamanın davam etdirilməsi məqsədilə Şəki rayon Prokurorluğuna göndərilib. Bu barədə Lent.az-a Respublika Baş Prokurorluğunun mətbuat xidmətindən məlumat verilib. Qeyd olunub ki, hazırda araşdırma Şəki rayon Prokurorluğu tərəfindən aparılır: “Həmin materiallar fevralın 10-da Şəki rayon Prokurorluğuna daxil olub. O vaxtdan etibarən araşdırmalar aparılır və yoxlamanın nəticəsi barədə vətəndaşa müvafiq cavab veriləcək”.

Qeyd edək ki, buna qədər iş Balakən rayon Prokurorluğunda araşdırılırdı.

Xatırladaq ki, Günel Lent.az-a verdiyi geniş açıqlamada həmkəndlisi Ramiz Əfəndiyev tərəfindən qaçırıldığını, iki uşaq atası olan 30 yaşlı qohumu Kənan tərəfindən zorlandığını, günahkarların Balakən rayon Polis İdarəsinin yüksək rütbəli əməkdaşlarından olan Qənaət İbrahimov tərəfindən himayə olunduğunu iddia edib. Günel 1990-cı il təvəllüdlüdür.

Pərvin ABBASOV