Dağıstanı lərzəyə salan “Tabasaran Əhməd” öldürüldü YENİLƏNİB - 2

Səhər tezdən Dərbənddə yaraqlılara qarşı aparılan əməliyyat bitib. Bu barədə Lent.az-a Dərbənddəki mənbə bildirib. Mənbənin dediyinə görə, şəhərin Maskina küçəsindəki evlərin birində gizlənənə 3 yaraqlı öldürülüb. Əməliyyat zamanı qonşuluqda yaşayan yaşlı qadın da həlak olub. Öldürülənlərdən biri Dağıstanda “Tabasaran Əhməd” ləqəbi ilə tanınan şəxsdir. “Tabasaran Əhməd” Dağıstan ərazisində bir neçə qətlin və partlayışın törədilməsində şübhəli bilinirdi.

****

11.27

Lent.az-ın Dağıstandakı mənbəyə istinadən verdiyi məlumata görə, döyüş Dərbəndin Maskina küçəsində, “Oazis” restoranın yaxınlığında gedir. Yaraqlılar gizləndikləri evi bu yaxınlarda alıblarmış. Hazırda həmin ev intensiv atəş altındadır. Bir qədər əvvəl qonşu mənzildə yaşayan yaşlı bir qadının həlak olması xəbəri gəldi.

Döyüş gedir.

****

10.58.

Bu dəqiqələrdə Rusiyanın güc strukturları ilə Dağıstanın Dərbənd şəhərindəki evlərdən birində gizlənən yaraqlılar arasında döyüş başlayıb. Dərbənddəki mənbədən Lent.az-a bildirildiyinə görə, yaraqlıların Dərbənddəki evlərdən birində gizləndiyini polisə qonşular xəbər verib. “Hazırda ev mühasirədədir. Yaraqlılar danışıqlardan və təslim olmaqdan imtina ediblər. Atışma başlayıb”.

Hadisələrin gedişi ilə bağlı məlumat verəcəyik.