Bakıda itkin düşən məktəblilərlə bağlı MARAQLI XƏBƏR - YENİLƏNİB

Fevralın 17-də axşam saatlarında Bakıda itkin düşən və bir gün sonra Hövsan qəsəbəsində tapılan məktəblilərin gecəni harada keçirdiyi məlum olub. Lent.az-ın əldə etdiyi məlumata görə, 11 yaşlı İsmayıl Şəfiyev və Şamil Babayev dərsdən çıxandan sonra Hövsan qəsəbəsinə yola düşüblər. Onları qəsəbəyə yol maşınlarından biri aparıb və qarşılığında bir manat veriblər. Məktəblilər fevralın 17-dən 18-nə keçən gecəni Hövsandakı kimsənin yaşamadığı evdə keçiriblər və heç nə yeməyiblər.

Maraqlıdır ki, itkin düşən uşaqlardan Şamil Babayevin nənəsi Hövsanda yaşasa da, onlar nənənin evinə getməyiblər. Dünən polisə azyaşlıların Zığ yolu istiqamətində görünməsi ilə bağlı məlumat daxil olandan sonra burada axtarışlar intensivləşdirilib və hər iki uşaq tapılaraq ailəsinə təhvil verilib. Məktəblilər dərsdən çıxıb adəti üzrə evə deyil, niyə Hövsana getmələrini isə izah etməkdə çətinlik çəkiblər.

*****

18 fevral

Dünən Bakıda itkin düşən məktəblilər tapılıb. Bu barədə Lent.az-a Nizami Rayon Polis İdarəsinin 25-ci Polis Bölməsinin rəisi Rəfael Albabayev məlumat verib. Onun sözlərinə görə, uşaqlar Hövsan qəsəbəsində tapılıblar. Onlar dünən axşam dərsdən çıxandan sonra Şamil Babayevin nənəsinin Hövsandakı evinə yola düşüblər.

17:56

Dünən Bakıda dərsdən çıxandan sonra itkin düşən məktəblilərlə bağlı polisə yeni məlumat daxil olub. Lent.az-ın əldə etdiyi məlumata görə, bir qədər əvvəl uşaqların Zığ qəsəbəsi istiqamətində olması ilə bağlı polisə məlumat daxil olub.

Bildirilir ki, itkin düşən 11 yaşlı uşaqlardan birinin nənəsi Hövsan qəsəbəsində yaşayır. Yeniyetmələrin də Hövsana getdiyi ehtimal edilir.

Qeyd edək ki, 32 saylı orta məktəbin rus bölməsinin 5-ci sinfində oxuyan İsmayıl Şəfiyev və Şamil Babayev dünən saat 17:20 radəılərində dərsdən çıxdıqdan sonra naməlum şəraitdə itkin düşüb.

*****

14:06

Dünən Bakıda itkin düşən iki məktəblidən hələ də xəbər yoxdur. Lent.az-ın əldə etdiyi məlumata görə, hüquq-mühafizə orqanları artıq uşaqların məktəbdən çıxaraq hansı istiqamətə getmələrini əks etdirən görüntüləri əldə edib. Görüntülərdən bəlli olur ki, Nizami rayon 32 saylı orta məktəbin rus bölməsində 5-ci sinifdə təhsil alan 11 yaşlı Şamil Babayev və İsmayıl Şəfiyev dünən saat 17:20 radələrində məktəbdən çıxıb. Onlar piyada üzü “Neftçilər” metrostansiyası istiqamətinə gedib və "Dakar" dairəsi yaxınlığında kameraların nəzarət dairəsindən çıxıblar. Məktəblilər hərəkət edərək 25-ci Polis Bölməsinin ərazisindən 24-cü Polis Bölməsinin ərazisinə keçiblər.

Polis görüntülərdən belə qənaətə gəlib ki, yeniyetmələr gərgin psixoloji durumda olmayıb və gəzə-gəzə məktəbdən uzaqlaşıblar.

İsmayıl Şəfiyev dərsə getməmişdən əvvəl evdə özünə məxsus kassasından 100 manat götürüb.

Hazırda polis məktəblilərin axtarışını davam etdirir. Onların xarakterik əlamətləri və fotoları aidiyyəti idarələrə göndərilib.

Bildirilir ki, itkin düşən hər iki məktəblinin atası azərbaycanlı, anası isə rusdur.