Uşağa oyuncaq yığmağı necə öyrətmək olar? - Tərbiyə hiylələri

Oyuncaqların yığıldığı, səliqənin cəza yox, həyatın təbii bir hissəsi olduğu ev – uşağın öz məkanına görə məsuliyyət hissini öyrəndiyi yerdir. Uşağa oyuncaqlarını yığmağı öyrətmək – hər zaman asan olmasa da, tamamilə mümkündür. Bu, sadəcə yerin təmizliyi ilə bağlı deyil, həm də müstəqilliyə, özünə və başqasının zəhmətinə hörmətə atılan mühüm addımdır.

Lent.az bununla bağlı maraqlı məlumatları sizə təqdim edir:

Açar – ardıcıllıq və səbirlə davranmaqdır. Öyrətməyə erkən yaşlardan başlayın. Bəli, iki yaşlı uşaq hər şeyi mükəmməl toplamayacaq, amma prosesdə iştirakı artıq bir uğurdur.

Nümunə göstərin – özünüz yığaraq və etdiyiniz hərəkətləri şərh edərək:
"Ayı yorulub, indi qutusunda yatacaq".
"Maşınlar qaraja, rəfə gedir".

Toplamağı gündəlik rituallardan birinə çevirin, məsələn: hər dəfə nahardan, gəzintidən və ya yatmazdan əvvəl. Bu, uşağa proqnozlaşdırıla bilən bir qayda verir.

Sıxıcı işi oyuna çevirin.
"Görək, kim daha tez qırmızı kubikləri yığacaq"?.
"Topları əjdahadan gizlədək və səbətə qoyaq".
"Təmizlik mahnısını qoşaq – rəqs edək və yığışdıraq".

Əyləncə və maraq möcüzələr yaradır. Kiçiklər üçün çox yaxşı işləyən üsullardan biri də – “yeni oyuncağı götürməzdən əvvəl birini yığmaqdır”. Bu, uşağı yormur və başladığını tamamlamasını öyrədir. Oyuncaqları uşağın asanlıqla yığa biləcəyi şəkildə saxlayın. Açıq səbətlər, alçaq rəflər, şəffaf qutular – bütün bunlar həm çeşidləməni, həm də çatımı asanlaşdırır. Məkanları aydın şəkildə təyin edin: kuklalar burada, konstruktor orada, kitablar isə buradadır. Görsəl nizam uşaq üçün yön tapmaqda kömək edir. Və mükəmməllik tələb etməyin! Əsas olan – səy və vərdişdir. Maşınlar düz düzülməyibsə tənqid etmək əvəzinə, belə deyin:
"Afərin sənə, bütün maşınları özün qutuya yığmısan". "İndi otaqda nə qədər gözəl görsənir". Fəaliyyətə görə verilən konkret tərif ümumi sözlərdən daha güclü motivasiya yaradır. Gözləntilərinizdə real olun. Üç yaşlı uşağa yardım və istiqamət lazımdır, altı yaşlı isə artıq özbaşına edə bilər – amma sizin nəzarətinizlə.

Uşağa göstərin ki, yığışdırmaq ümumi işdir:
"Gəl mən kitabları yığım, sən də kubikləri".
Birlikdə görülən iş bağ qurur.

Və ən vacibi – özünüz nümunə olun. Əgər sizin əşyalarınız səpələnibsə, amma siz uşaqdan səliqə tələb edirsinizsə – bu nə ədalətlidir, nə də effektiv. Oyuncaqların səpələnməsinə görə cəzadan və ya yığışdırmaq üçün rüşvətdən qaçın. Məqsəd – qorxu və ya ödəmələr deyil, uşağın başa düşməsi ki, səliqə – normal və rahat bir haldır, və bunu saxlamaq – onun məsuliyyətidir. İnadkarlıq, xoş niyyət və uşağa olan inam təmizliyi mübarizədən faydalı vərdişə çevirməkdə sizə kömək edəcək.