[b]Azərbaycanın azyaşlı vunderkindi yenə uğur qazandı[/b]

Dəfələrlə riyaziyyat üzrə beynəlxalq olimpiadaların qalibi olan Turqay Qaybalıyev yenə böyük nailiyyətlərlə ölkəmizə qayıdıb.

Lent.az-a danışan 13 yaşlı vunderkind bu il ərzində Antalya və Bolqarıstanda keçirilən olimpiadalarda iştirak edərək uğur qazandığını deyib.

T.Qaybalıyev bildirir ki, bu ilin iyun ayında Bolqarıstanda keçirilən Sərhədsiz Riyaziyyat Turnirində iştirak etmək üçün üç turdan keçib: “Bu turnir mərhələli keçirilir. Əvvəl qış turuna qatıldım. Bürünc medal əldə edib növbəti tura vəsiqə əldə etdim. Yaz turunda finala vəsiqə aldım. Finalda isə iki sinif üzrə qatıldım. Səkkizinci siniflərlə yarış zamanı I yerin qalibi oldum. Daha sonra həmyaşıdlarımla yarış zamanı isə II yerin medalı və kuboku qazandım”.

T.Qaybalıyev bu il Antalyada keçirilən Beynəlxalq Fənn Olimpiadada ölkəmizi təmsil edib, 2 gümüş, 1 qızıl medal əldə edib. Özü uğurları barədə bunları danışır: “Bu ilin oktyabr ayında Antalyada keçirilən Beynəlxalq Fənn Olimpiadasına qatıldım və fizika fənni üzrə II, riyaziyyat fənnindən II, ingilis dilindən isə I yer tutdum”.

Balaca vunderkind deyir ki, hazırda respublika turlarına hazırlaşır. Seçim turlarına qatılan Turqay seçilsə IX sinfi üzrə riyaziyyat fənn olimpiadalarında iştirak edəcək: “Sinqapurda keçiriləcək riyaziyyat olimpiadasına da qatılmaq istəyirəm. Apreldə dövlətlərarası online seçim keçiriləcək, seçilsəm, avqust ayında Sinqapurda baş tutacaq finalda iştirak edəcəm”.

Qeyd edək ki, hazırda Bakı Modern məktəbinin 7-ci sinfinin şagirdi olan T.Qaybalıyev ilk qələbəsini 2011-ci ildə ikinci sinifdə oxuyanda qazanıb. Məktəbdaxili bilik olimpiadasının birincisi olub. Ardınca yenə məktəblərarası bilik olimpiadasında birinci yrdə olub. Növbəti uğuru isə əvvəlkilərdən çox daha böyük olub. O, Türkiyədə keçirilən V Beynəlxalq Antalya Olimpiadasına yer qazanıb.

2013-cü ildə Antalyada keçirilən Beynəlxalq Olimpiadada Azərbaycanı riyaziyyat fənni üzrə təmsil edərək qızıl medal və diploma layiq görülüb. 2014-cü ildə yenə də Antalyada beynəlxalq olimpiadada ölkəmizi iki fənn üzrə təmsil edib. Riyaziyyat və ingilis dilindən ikinci yeri qazanıb.

O, növbəti uğurunu Bolqarıstanda keçirilən Sərhədsiz Riyaziyyat Turnirində qazanır. Həm yaşıdları ilə, həm də altıncı siniflərlə yarışmada hər iki sinif üzrə ikinci yeri tutub. O, bu turnirdə Azərbaycana 2 medal və kubok qazandırıb.

Dəfələrlə məktəb birincilikləri olan Turqayın doqquzuncu sinfə çatanda ölkə birinciliyini də qələbələri sırasına əlavə edəcəyinə əmindir.