Magistratura imtahanında iştirak edəcək şəxslərin nəzərinə

2017/2018-ci tədris ilində Azərbaycanın ali təhsil müəssisələrinin və AMEA-nın magistraturalarına eləcə də test imtahanının I mərhələsində iştirak edəcək bakalavrlara "Buraxılış vərəqəsi"nin çap edilməsinə başlanıb.

Lent.az-ın məlumatına görə, bunun üçün bakalavrlar "Bakalavrın imtahana buraxılış vərəqəsi"ni eservices.dim.gov.az/erizemag/brxvmag internet səhifəsinə daxil olaraq çap edib götürməli, imtahanın yeri və keçirilmə tarixi qeyd olunan buraxılış vərəqəsini (hər mərhələ üçün ayrısa) və şəxsiyyətlərini təsdiq edən sənədi imtahana hökmən gətirməlidirlər.

Bildirək ki, magistratura imtahanın birinci mərhələsi aprelin 9-da Bakı, Naxçıvan, Gəncə, Mingəçevir və Lənkəran şəhərlərində keçiriləcək.

Birinci mərhələdə 50 və daha çox bal toplayaraq müsabiqə şərtlərini ödəyən və imtahanın ikinci mərhələsinə buraxılan bütün bakalavrlar bitirdikləri bakalavr ixtisaslarından asılı olmayaraq, jurnalistika ixtisası üzrə magistratura ixtisaslaşmalarına qəbul olmaq üçün müraciət edə bilərlər.

Qeyd edək ki, bu il Azərbaycanın ali təhsil müəssisələrinin və Azərbaycan Milli Elmlər Akademiyasının magistraturalarına 13080 nəfər ərizəsini təsdiq edib ki, onlardan 11816-sı Azərbaycan, 1264-ü isə Rus dili bölməsinin məzunudur.