Mindən çox musiqiçi İsrailin müsabiqədən kənarlaşdırılmasını tələb edir və “Avroviziya 2026”nı boykot etməyə çağırır.
“Avroviziya 2026” müsabiqəsi ətrafında yeni beynəlxalq qalmaqal yaranır.
Lent.az-ın xarici mediaya istinadən xəbərinə görə, mindən çox sənətçi İsrailin iştirakı səbəbindən müsabiqəni boykot etməyi və İsrailin KAN televiziya kanalını Avropa Yayım Birliyindən kənarlaşdırmağı tələb edən açıq məktub imzalayıb.
"The Guardian" qəzetinin məlumatına görə, petisiyanı imzalayanlar arasında Massive Attack, Kneecap, Brayan İno, Sigur Rós, Nadine Shah, Mogwai və Hot Chip var. Kampaniyanı "Soyqırıma Musiqi Yox" və "İsrailin Akademik və Mədəni Boykotuna Fələstin Kampaniyası" hərəkatları başladıb.
Məktub müəllifləri bildirirlər ki, İsrail Qəzza zolağındakı müharibəyə baxmayaraq, artıq üçüncü ildir yarışmada iştirak etməyə davam edir. Onlar Rusiyanın 2022-ci ildə Ukraynaya qarşı müharibə başladıqdan sonra "Eurovision"dan kənarlaşdırıldığını qeyd edir və İsrail üçün də oxşar yanaşma tələb edirlər.
Müraciətdə İsrailə qarşı ittihamlar, o cümlədən Qəzzanın mədəni infrastrukturunun dağıdılması və bölgədəki ağır humanitar vəziyyət iddiaları yer alır. Həmçinin, İsrail həbsxanalarında fələstinli uşaqların saxlanılması ilə bağlı ittihamlar da xüsusi qeyd olunur.
Kampaniyanın nümayəndələri müsabiqədə iştirakın, onların fikrincə, siyasi məsələ olduğunu vurğulayır və sənətçilərin və təşkilatçıların susqunluğunu şəriklik forması adlandırırlar.
Bundan əlavə, kampaniyanın təşkilatçıları İspaniya, İrlandiya, Sloveniya, Hollandiya və İslandiyanın müsabiqədən çıxmaq qərarlarını alqışlayıblar və milli seçimlərdən çıxan sənətçiləri də dəstəkləyiblər.
Avropa Yayım Birliyi də öz növbəsində İsrailin müsabiqədə iştirakına icazə veriləcəyini dəfələrlə bildirib. Rusiyanın 2022-ci ildə qəbul edilmiş diskvalifikasiya qərarı qüvvədə qalır.
İsrail ittihamları rədd edir və beynəlxalq musiqi müsabiqəsində iştirak etmək hüququna malik olduğunu iddia edir.
70 illik yubiley "Eurovision" Mahnı Müsabiqəsi 2026-cı ilin may ayında Vyanada keçiriləcək. Final mayın 16-na planlaşdırılıb.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
