YUĞ Teatrı yeni layihəyə başlayıb

Azərbaycan Dövlət YUĞ Teatrı “Teatr: təcrübədən nəzəriyyəyə” adlı layihə həyata keçirir. Teatrdan Lent.az-a verilən məlumata görə, uzun müddətli silsilə tədbirləri nəzərdə tutan layihə milli teatr prosesində canlanma yaratmağa, teatrla cəmiyyət, teatr xadimləri, dramaturqlar, yazarlar, tələbələr arasında intensiv qarşılıqlı ünsiyyət yaratmağa yönəlib.

Layihə çərçivəsində ilk tədbir mart 14, yəni bu gün saat 16.00-da reallaşacaq. Müasir dramaturgiyanın problemlərinə həsr olunmuş tədbirdə Mehman Musabəylinin “Toy səyahəti” pyesinin teatrallaşdırılmış oxunuşundan sonra ingilis rejissor Metyu Qoldun iştirakı ilə seminar keçiriləcək. Sonra dramaturqların, teatrşünasların, rejissor və aktyorların, ədəbi tənqidçilərin, jurnalistlərin və tələbələrin iştirakı ilə müzakirə olacaq.

Sənət ocağının yaradıcı heyəti bu cür layihəni teatr prosesini hərəkətə gətirən, yaşadan ən vacib amilin qarşılıqlı ünsiyyət olduğunu nəzərə alaraq gerçəkləşdirmək qərarına gəlib. Bu ünsiyyət yalnız teatr-tamaşaçı müstəvisində deyil, həmçinin teatrsevərlərin, bu sahəyə hər hansı bir səmərə vermək potensialına malik insanların arasında qurulmalıdır.

Bununla yanaşı, dünya təcrübəsi göstərir ki, buna nail olmaq üçün müxtəlif tipli teatr festivallarının, konfransların, seminarların, treninqlərin, master-klassların, şou-keyslərin və s. tədbirlərin təşkili xüsusi önəm daşıyır. Gənc rejissor, aktyor, teatrşünas, dramaturq kadrlar məhz bu tipli tədbirlərdə aşkarlanır, yetişir və inkişaf edir. Odur ki, milli teatr prosesini canlandırmaq üçün Avropa teatr təcrübəsində sınaqdan keçmiş üsul və vasitələrin tətbiq edilməsi produktivdir.

Teatrlar və ictimaiyyət arasında yaradıcılıq mübadiləsini təmin etməklə yeni rejissor, aktyor, dramaturq kadrların aşkarlanmasına və onların aktiv teatr fəaliyyətinə cəlb olunmasına zəmin yaratmaq məqsədi daşıyan layihəmizdə bütün qələm və düşüncə sahiblərini görmək istərdik.