Bakıda 2 fevral - Gənclər günü qeyd ediləcək

Mədəniyyət və Turizm Nazirliyinin Bakı şəhər Mədəniyyət və Turizm İdarəsi 2 fevral – Gənclər günü ilə əlaqədar tabeliyində olan müəssisələrdə keçiriləcək tədbirlər planını təsdiq edib. Bu barədə idarədən Lent.az-a verilən məlumatda deyilir. İdarənin tabeliyində olan mədəniyyət evləri, uşaq musiqi və incəsənət məktəbləri, kitabxanalar, muzey və mərkəzlərdə 2 fevral – Gənclər gününə həsr olunmuş sərgilər, söhbətlər, slayd-şoular, yarışmalar, dəyirmi masalar, görüşlər, tamaşalar, ekskursiyalar, məruzələr, mühazirələr və konsertlər təşkil ediləcək.

Xatırladaq ki, 1997-ci ildə Azərbaycan Respublikasının Prezidenti Heydər Əliyevin imzaladığı Sərəncama əsasən fevralın 2 - Azərbaycan Gəncləri günü elan olunub və o gündən bəri respublika əhalisinin 30 faizindən çoxunu təşkil edən Azərbaycan gəncləri bu günü qürur və təntənə ilə qeyd edirlər.