80 milyardlıq reklam bazarı üçün yeni ittifaq yarandı

İnternet reklam bazarında əsas söz sahiblərinə çevrilmək üçün “Microsoft“ və “Yahoo” “Google”yə qarşı birləşdi
“Microsoft“ və “Yahoo” axtarış sistemi və internetdə reklam yerləşdirmək sahələrində 10 il ərzində əməkdaşlıqla bağlı razılaşma əldə edib.
Lent.az-ın türk mətbuatına istinadən yaydığı xəbərə görə, bu iki şirkət reklam bazarında “Google” ilə rəqabət aparmaq üçün bu əməkdaşlığı zəruri sayıb. Anlaşmanın əsasında bu iki şirkətin gəlirini bölüşdürməsi dayanır.
Əməkdaşlıq çərçivəsində “Yahoo” axtarış sistemində “Microsoft“ texnologiyalarından istifadə edəcək. İki şirkətin axtarış sistemlərinə verilən reklamlarla bağlı fəaliyyətə də “Yahoo” məsuliyyət daşıyacaq.
Anlaşmaya görə, “Yahoo” ilk 5 ildə öz sistemindəki bütün axtarış və reklam gəlirlərinin 88 faizini alacaq və “Microsoft“ un bəzi internet saytlarında reklam yerləşdirmə haqqına sahib olacaq.
“Yahoo” bu anlaşmanın illik gəlirlərini 500 milyon dollar artıracağı və 275 milyon dollara da qənaət etməyə imkan yaradacağı qənaətindədir.
İnternet üzərindən verilən reklamların gəlirləri uğrunda bu iki şirkətin bir araya gəlməsi isə təsadüfi deyil. Çünki bu gəlirlər kifayət qədər böyükdür. Hazırda 40 milyard dollara çatan bu reklam bazarının 2010-cu ildə 80 milyard dollar səviyyəsində olması gözlənilir.
Bu nəhəng reklam gəlirlərin çoxuna hazırda “Google” sahib çıxır. Məsələn, dünya miqyasında internet axtarış və reklam bazarında “Yahoo”nun payı cəmi 8 faiz, “Google”nin payı isə 67 faizdir. ABŞ-ın özündə isə “Google”nin payı 65 faiz, “Yahoo”nun payı 20 faizdir.

Ramiz