Dünya çempionatı tarixində ən "aqressiv" komanda ən çox çempion olan Braziliyadır.
Lent.az-ın xarici mediaya istinadən məlumatına görə, Braziliya iştirak etdiyi bütün turnirlərdə 11 qırmızı vərəqə alıb və bu, onu ən çox qırmızı vərəqə alan ölkəyə çevirib. Onları 10 qırmızı vərəqə ilə Argentina, hər biri 9 qırmızı vərəqə ilə Uruqvay və Kamerun izləyir.
Almaniya, İtaliya və Hollandiya hər biri səkkiz qırmızı vərəqə ilə cəzalandırılıb.
Türkiyə Dünya çempionatında iki qırmızı vərəqə alıb.
2002-ci il Dünya çempionatında Braziliyaya qarşı keçirilən və Türkiyənin 2:1 hesabı ilə məğlub olduğu oyunda Alpay Özalan və Hakan Ünsala qırmızı vərəqə göstərilib.
177 qırmızı vərəqə
Hakimlər bu günə qədər keçirilən 22 Dünya çempionatında 177 dəfə qırmızı vərəqə göstəriblər. 2006-cı ildə Almaniyada keçirilən Dünya çempionatı ən çox qırmızı vərəqə göstərilən turnir kimi diqqət çəkir - 28. 1950-ci il Braziliya və 1970-ci il Meksikada keçirilən dünya çempionatlarında hakimlər oyunçuları meydandan qovmaq üçün qırmızı vərəqəyə əl atmayıblar.
Dünya çempionatında hakimlərin qırmızı və sarı vərəqələr göstərməsi təcrübəsi 1970-ci ildə yaranıb. Əvvəlki turnirlərdə hakimlər oyunçulara vərəqə göstərmədən onları meydandan qovublar və ya xəbərdarlıq ediblər.
Dünya çempionatında ilk qirmizi vərəqəni türk hakim göstərib
Dünya çempionatında qırmızı vərəqə sistemi 1970-ci ildə Meksikada başlayıb. Lakin hakimlər bu turnirdə qırmızı vərəqələrindən istifadə etməybilər.
1974-cü ildə Almaniyada keçirilən Dünya çempionatına çağırılan ilk türk hakim Doğan Babacan turnirdə tarix yazıb. Berlində Almaniya ilə Çili arasında keçirilən oyunun 67-ci dəqiqəsində Babacan çilili oyunçu Karlos Kaszelini qırmızı vərəqə ilə meydandan qovub. Bu, Dünya çempionatı tarixində ilk qırmızı vərəqə olub.
Bir oyunda dörd qirmizi vərəqə
Dünya çempionatının bir oyununda indiyə qədər göstərilən ən yüksək qırmızı vərəqə sayı dörddür.
2006-cı ildə Almaniyada keçirilən Portuqaliya-Hollandiya oyunu ən çox qırmızı vərəqə rekorduna sahibdir. Həmin oyunda rusiyalı hakim Valentin İvanov qırmızı vərəqəsindən dörd dəfə istifadə edib.
Portuqaliyada Kostinya (45+1-ci dəqiqə) və Deko (78-ci dəqiqə) qırmızı vərəqə ilə meydandan qovulub, Hollandiyada isə Xalid Bulahruz (64-cü dəqiqə) və Covanni Van Bronkhorst (90+5-ci dəqiqə) meydandan qovulub.
Portuqaliya 1/8 final mərhələsində keçirilən oyunda Manişenin qolu ilə 1:0 hesablı qələbə qazanaraq növbəti mərhələyə yüksəlib.
Final oyununda ilk qirmizi vərəqə 1990-ci ildə olub
Dünya çempionatının finalında ilk qırmızı vərəqə 1990-cı ildə İtaliyada göstərilib.
Qərbi Almaniya ilə Argentina arasında keçirilən finalda Cənubi Amerika komandası 65-ci dəqiqədə Pedro Monzon qırmızı vərəqə aldıqdan sonra 10 nəfərlə qalıb. Beləliklə, Monzon Dünya çempionatı finalında qırmızı vərəqə alan ilk oyunçu olub.
Qərbi Almaniyanın 85-ci dəqiqədə Andreas Brehmenin penalti qolu ilə 1:0 hesabı ilə qalib gəldiyi oyunda, Argentina 87-ci dəqiqədə Qustavo Dezotti qırmızı vərəqə aldıqdan sonra oyunu 9 oyunçu ilə başa vurub.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
