Qadın atasının qətlini sifariş etməyi planlaşdırdı: əri qarşısını aldı

Xabarovskda yerli sakinə qarşı cinayət işi açılıb - o, atasının sifarişli qətlini təşkil etməyə cəhddə şübhəli bilinir.

Lent.az xarici KİV-ə istinadla bildirir ki, bu barədə idarənin mətbuat xidmətindən məlumat verilib.

Müstəntiqlərin sözlərinə görə, bu ilin payızında qətli törədəcək şəxsin axtarışına başlayan qadın kömək üçün ərinə müraciət edib - atasının mənzilini özü üçün mənimsəmək istəyirmiş.

Kişi arvadının niyyətini polisə xəbər verib. Hüquq-mühafizə orqanlarının əməkdaşlarının nəzarəti altında cinayət səhnələşdirilib - sifarişçiyə öldürüldüyü iddia edilən atanın cəsədinin fotoşəkili göstərilib.

Faktla bağlı Rusiya Federasiyası Cinayət Məcəlləsinin 30, 33 və 105-ci maddələri (qabaqcadan əlbir olaraq bir qrup şəxs tərəfindən muzdlu adam öldürməyə hazırlığın təşkili) ilə cinayət işi açılıb, müstəntiqlər şahidləri dindirir. Dindirilmə zamanı təqsirləndirilən şəxs günahını etiraf edib və hazırda ev dustaqlığındadır.