Obama müsəlman olması iddialarına cavab verdi

ABŞ prezidenti Barak Obama müsəlman olması barədə iddiaları cavablandırıb. APA TV-nin məlumatına görə, Ağ Evdə akkreditə olunmuş jurnalistlərə verdiyi nahar mərasimində çıxış edən Obama müsəlman olmadığına işarə vurub. “ABŞ prezidenti olmaq asan iş deyil. Həm kifayət qədər boşluqlar olan miqrasiya sistemimizi qaydasına salmalı, həm Konqresi veto ilə hədələməli, həm də İranla müzakirələr aparmalıyam. Bütün bu işləri görərkən üstəlik gündə beş dəfə namaz qılmağa da vaxt tapmalıyam”.

Obamanın “Sizin gizli bir müsəlman olduğunuz iddia edilir” sualına bu istehzalı cavabı islam ölkələrində narazılıqla qarşılanıb. Qeyd edək ki, 2012-ci ildə keçirilən sosioloji sorğu zamanı ABŞ əhalisinin 17 faizinin əslən keniyalı olan Obamanın gizli müsəlman olduğuna inandığını söyləmişdi. Buna cavab olaraq xristian olduğunu açıqlayan Obama “Barak H. Obama” şəklində yazılan ad soyadında “Hüseyn” adını ifadə edən “H” hərfindən istifadədən imtina etmişdi.