224
12:58
23 Oktyabr 2019

Bakıda quldurluq edən keçmiş məhkum tutuldu

Oktyabrın 22-də saat 2 radələrində Sabunçu rayonu, Ramana qəsəbəsində 3 nəfərin A.İsmayılovu bıçaqla hədələyib “VAZ-2107” markalı maşında aparılması barədə Daxili İşlər Nazirliyinin “102” Zəng Mərkəzinə müraciət daxil olub.
Nazirlikdən Lent.az -a verilən məlumata görə, məlumatla əlaqədar dərhal Sabunçu rayon Polis İdarəsinin əməkdaşları müvafiq tədbirlər həyata keçiriblər.
Sabunçu rayon Polis İdarəsi Post Patrul Xidməti Bölməsi, Dövlət Yol Polisi Şöbəsi və 12-ci Polis Şöbəsi əməkdaşlarının birgə keçirdikləri təxirəsalınmaz əməliyyat-axtarış tədbirləri nəticəsində həmin maşını idarə edən Bakı şəhər sakini, əvvəllər məhkum olunmuş K.Əsgərov Sabunçu qəsəbəsi ərazisində avtomobillə birgə saxlanılıb.
Polis əməkdaşları bu cinayət əməlini törətməkdə şübhəli bilinən digər 2 nəfərin də şəxsiyyətlərini müəyyən ediblər.
Üz və bədən nahiyəsindən xəsarət alan A.İsmayılov xəstəxanaya yerləşdirilib.
Araşdırma aparılır.