Dəmir yolçuların 51-ci toplantıya hazırlaşır

Oktyabrın 27-28-də Daşkənddə MDB və Baltikyanı ölkələrin Dəmir Yolu Nəqliyyatı Şurasının 51-ci toplantısı keçiriləcək. İclasda dəmir yolu nəqliyyatı ilə əlaqəli 16 məsələ ətrafında müzakirələr aparılacaq.

“Azərbaycan Dəmir Yolları” Qapalı Səhmdar Cəmiyyətinin mətbuat xidmətindən Lent.az-a bildiriblər ki, yığıncaqda müzakirə olunacaq mövzuların siyahısına Şuranın 50-ci iclasının qərarlarının yerinə yetirilməsi və 2009-cu ilin 9 ayında dəmir yolu şəbəkəsi üzrə istismar işlərinin yekunları, 2010-2011-ci illər üçün qatarların hərəkət cədvəlinin normativləri, 2009-cu ilin may ayında qatarların, 2009-cu ilin sentyabrında konteynerlərin siyahıya alınmasının yekunları, sərnişin vaqonlarından istifadə və beynəlxalq istiqamətdə sərnişin qatarlarının təhlükəsiz hərəkətinin təmin olunmasına görə razılığa əlavə və dəyişikliklərin edilməsi kimi məsələlər daxildir.

Toplantısında “Azərbaycan Dəmir Yolları” QSC-nin sədri Arif Əsgərovun başçılıq etdiyi nümayəndə heyəti də iştirak edəcək.

Elxan SALAHOV