Pilotların tətili Aşqabad-Bakı reysinə mane olmayıb

Bu günə nəzərdə tutulan Frankfurt-Bakı reysinin taleyi isə məlum deyil

Almaniyanın “Lüfthansa” şirkətinin pilotları 4 gün planlaşdırılan tətili dayandırmağa razılaşıblar.

Lent.az-ın BBC-yə istinadən verdiyi məlumata görə, pilotların 1 gün davam edən tətili nəticəsində “Lüfthansa” şirkəti 25 milyon avro ziyana düşüb.

Ancaq problem həm də ondadır ki, əmək haqlarının artırılmasını və uçuşların təhlükəsizliyinin daha yüksək səviyyədə təmin olunmasını tələb edən pilotların tətilləri iki həftədən sonra yenidən başlaya bilər. Frankfurt Məhkəməsində şirkət rəhbərliyi və pilotlar arasında əldə olunan razılığa görə, növbəti tətil martın 9-dan tez başlamamalıdır. Bu müddət ərzində tərəflər razılaşma əldə etməyə çalışacaqlar.

Ancaq pilotların tətili təxirə salmalarına baxmayaraq, “Lüfthansa” şirkəti bu gün də nəzərdə tutulan 800 daxili və beynəlxalq aviareysi ləğv edib. Xatırladaq ki, fevralın 22-də 1800 daxili və beynəlxalq reysdən 900 aviareys ləğv olunmuşdu.
Qeyd edək ki, “Lüfthansa” şirkəti Azərbaycana da reyslər həyata keçirir. “Lüfthansa” şirkəti həftənin I, III və V günləri Aşqabad-Bakı reysini, II, IV və bazar günləri Frankfurt-Bakı reyslərini həyata keçirir.

AZAL-ın xidmət rəisi Məhərrəm Səfərli Lent.az-a açıqlamasında deyib ki, “Lüfthansa” şirkətinin təyyarəsi dünən Aşqabad-Bakı reysini həyata keçirib. O, şirkətin bu gün Frankfurt-Bakı reysini həyata keçirib-keçirməyəcəyi ilə bağlı dəqiq məlumatının isə olmadığını söyləyib və bu sualı ancaq “Lüfthansa” şirkətinin cavablandıra biləcəyini söyləyib.