“Bakı”nın qapıçısının vəziyyəti ciddidir

Topaz Premyer Liqasının XVIII turunda “Şəfa” stadionunda “İnter”lə oyun zamanı ciddi zədə alan Edin Nuredineskinin vəziyyəti sabitləşmək üzrədir. Lent.az-ın məlumatına görə, klubun həkimi Rafiq Hüseynov qolkiperin vəziyyətinin bit qədər sabitləşdiyini, bununla belə ciddiliyini qoruduğunu bildirib.

O deyib: “Nuredineski hələ də Mərkəzi Gömrük Klinikasında müalicə alır. Hazırda onun vəziyyəti bir qədər sabitləşsə də, ciddiliyini qoruyur. Dekabrın 24-də Nuredineskini bir daha müayinədən keçirəcəyik. Yalnız bundan sonra onun xəstəxanadan nə zaman evə buraxılmacağına aydınlıq gələcək. Edin ciddi zərbə alıb. Onun boyun nahiyəsinə tikiş qoyulub. Beyninə qan sızacağından narahat idik, xoşbəxtlikdən belə hal qeydə alınmayıb”.

Qeyd edək ki, oyunun 55-ci dəqiqəsində Edin Nuredineski “İnter”in hücumçusu Samir Zərgərovla toqquşaraq başından ciddi zərbə alıb. Bir müddət huşsuz qalan qapışı təcili yardım avtomobili ilə xəstəxanaya çatdırılıb və tomoqrafiya müayinəsindən keçirilib.

Bu arada bir qrup "Bakı" azarkeşi və fan-klub üzvləri Nuredineskini xəstəxanada ziyarət etmək üçün Mərkəzi Gömrük Klinikasına yollanıblar. Ancaq bu görüş həkimlərin israrlı tələbi ilə baş tutmayıb. Müalicə həkimi xəstənin sakitliyə ehtiyacı olduğunu bildirərək azarkeşlərin ona baş çəkməsinə icazə verməyib.