Smartfonun batareyası bir ayara görə sürətlə tükənə bilər - XƏBƏRDARLIQ

Smartfonun batareyasının tez boşalması hər zaman akkumulyatorun köhnəlməsi ilə bağlı olmur. Mütəxəssislər bildirirlər ki, enerji sərfiyyatını artıran əsas səbəblərdən biri ekran parametrləridir.

Lent.az xəbər verir ki, müasir smartfonlarda 90, 120, hətta 144 Hz yenilənmə tezliyinə malik ekranlardan istifadə olunur. Bu texnologiya animasiyaları və menyular arasında keçidləri daha axıcı etsə də, batareyanın daha sürətli tükənməsinə səbəb olur.

Maksimum parlaqlıq da enerjini sürətlə sərf edir

Enerji sərfiyyatını artıran digər əsas amil ekranın maksimum parlaqlıq səviyyəsində işləməsidir. Xüsusilə günəşli havada istifadəçilər ekranı daha rahat görmək üçün parlaqlığı maksimuma qaldırırlar. Bu isə batareyanın daha tez boşalmasına səbəb olur.

Hansı funksiyalar batareyanı daha çox tükədir?

Mütəxəssislərin sözlərinə görə, aşağıdakı funksiyalar da enerji sərfiyyatını artırır:

daim aktiv geolokasiya (GPS);
arxa planda işləyən tətbiqlər;
məlumatların avtomatik sinxronizasiyası;
messencer və sosial şəbəkələrin fasiləsiz fəaliyyəti;
zəif mobil şəbəkə siqnalı;
istifadə olunmadığı halda açıq qalan Bluetooth, Wi-Fi və NFC modulları.

Telefon mobil şəbəkənin zəif olduğu ərazilərdə daha çox enerji sərf edir. Çünki cihaz rabitəni saxlamaq üçün davamlı olaraq siqnal axtarır.

Batareyanın ömrünü necə uzatmaq olar?

Smartfonun enerji sərfiyyatını azaltmaq üçün mütəxəssislər aşağıdakı tövsiyələri verirlər:

ekran parlaqlığını avtomatik rejimə keçirmək;
ehtiyac olmadıqda ekranın standart yenilənmə tezliyindən istifadə etmək;
arxa planda işləyən tətbiqləri nəzarətdə saxlamaq;
Bluetooth, Wi-Fi və NFC-ni istifadə edilmədikdə söndürmək;
əməliyyat sisteminin yeniləmələrini vaxtında quraşdırmaq.