İstehsalçılar artıq smartfonlara batareyanın ömrünü uzatmağa kömək edən funksiyalar əlavə ediblər, lakin bir çox istifadəçi onları ya aktiv etmir, ya da ümumiyyətlə mövcudluğundan xəbərsizdir.
Lent.az xəbər verir ki, əksər istifadəçilər smartfonlarını hər gün 100%-ə qədər doldurur və bunu normal hesab edir. Axı tam doldurulmuş batareya daha uzun istifadə müddəti deməkdir. Amma əslində, demək olar ki, bütün litium-ion batareya-lar (iPhone və Android cihazlarında istifadə olunur) uzun müddət 100% səviyyəsində qalanda və ya tez-tez tam boşaldıldıqda daha sürətli köhnəlir. İstehsalçılar artıq batareyanın ömrünü uzatmaq üçün xüsusi funksiyalar təqdim ediblər, lakin istifadəçilər çox vaxt onları aktivləşdirmir. Əgər smartfondan 2 ildən çox istifadə etməyi planlaşdırırsınızsa, bu ayarlar batareyanın ömrünü əhəmiyyətli dərəcədə uzada bilər.
iPhone-da şarjı necə düzgün tənzimləmək olar
iPhone istifadəçiləri “Ayarlar” - “Batareya” - “Şarj” bölməsinə daxil olaraq iki vacib funksiyanı tapa bilərlər:
“Optimallaşdırılmış batareya şarjı” - bu funksiya sizin gündəlik şarj vərdişlərinizi öyrənir və 80%-dən sonra şarjı yavaşladır. Nəticədə cihaz adətən ayırdığınız vaxta yaxın 100%-ə çatır. Bu xüsusilə gecə şarjı üçün effektivdir. Maksimum şarj səviyyəsini məhdudlaşdırmaq yeni iOS versiyalarında şarjı, məsələn, 85%-də saxlamaq mümkündür. Bu, batareyaya düşən yükü azaldır və ömrünü uzadır.
Android-də şarjı necə optimallaşdırmaq olar
Android cihazlarında da oxşar funksiyalar mövcuddur, lakin adları və yerləri istehsalçıdan asılı olaraq dəyişir:
Samsung: “Ayarlar” - “Batareya” - “Əlavə ayarlar” bölməsində “Protect battery” funksiyasını aktiv edin. Bu, şarjı 85%-lə məhdudlaşdırır.
Google Pixel cihazlarında “Adaptive Charging” funksiyası var. Bu funksiya yuxu rejiminizi analiz edir və batareyanı yalnız oyandığınız vaxta yaxın 100%-ə çatdırır. Digər istehsalçılarda da oxşar funksiyalar mövcuddur və adətən “optimallaşdırılmış şarj” və ya “batareya qorunması” kimi adlandırılır. Mütəxəssislər vurğulayır ki, əsas problem telefondan səhv istifadə deyil, onu daim 100% səviyyəsində saxlamaq vərdişidir. Şarj məhdudlaşdırma funksiyalarını aktiv etmək batareyanın ömrünü uzatmağın ən sadə yollarından biridir.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
