"Instagram"da qəribə problem - Köhnə videoların səsi itib

“Instagram” sosial şəbəkəsindəki köhnə videoların bir çoxu səsini itirib.

Lent.az xəbər verir ki, belə videoları oynatmağa çalışdığınız zaman “videoda səs yoxdur” bildirişi görünür.

Məlumata görə, 2013-cü ilin iyunundan (video dəstəyinin tətbiq olunduğu vaxt) 2014-cü ilin oktyabr ayına qədər “Instagram”a əlavə edilən videolarda səs itib. Maraqlıdır ki, problem istifadəçinin cihazından asılı deyil. Belə ki, həm kompüterdə, həm də smartfonlarda bu videolarda səs yoxdur. Problemin bu müddət ərzində yayımlanan bütün videolara təsir etdiyi görünür və bunun müəllif hüququ problemindən çox platformadakı nasazlığın səbəb olduğunu göstərir.

Köhnə “Instagram” istifadəçiləri üçün videolarında səsin yoxa çıxması ciddi problem və itki ola bilər. Çünki çoxları bu sosial şəbəkədən həyatlarında mühüm anların xatirələrini saxlamaq üçün istifadə edir və səs atmosferin çatdırılmasında mühüm rol oynayır.

Qeyd edək ki, köhnə videolarda səs ən azı bir neçə ay əvvəl itməyə başlayıb. Artıq bu ilin may və iyun aylarında istifadəçilər bu problemlə bağlı şikayət etməyə başlayıblar. “Instagram”ın sahibi “Meta Platforms” problemin aradan qaldırılması üçün çalışdığını bildirib. Ancaq problemin səbəbi və ya həlli üçün vaxt çərçivəsi haqqında məlumat verməyib. Meta sözçüsü Sein Kim yaranan narahatlığa görə üzr istəyib və əlavə edib ki, problem həll olunur.